بسبب كلهم بيحبوا مودي.. إيرينا يسري تتعرض للتهديد من أحد المعجبين
خرجت الفنانة إيرينا يسري بطلة مسلسل كلهم بيحبوا مودي عن صمتها، لتعلن عن تعرضها للتهديد من قبل أحد المعجبين، وذلك من خلال منشور عبر حسابها الرسمي على موقع تبادل الصور والفيديوهات لتستغيث من خلاله.
وقالت إيرينا يسري معلقة: “ أنا حياتى فى خطر، أنا أول مرة فى حياتى اكتب حاجة بالشكل ده ودايما محافظة على خصوصية حياتى الشخصية بس لما الأمر يهدد حياتى و مستقبلى والناس المحيطين بيا فا أنا مش قادرة الصراحة اسكت عنه، من ساعة ما اخدت لقب ملكة جمال ودخلت أول مسلسل ليا فى التمثيل و فى شخص اسمه بلال بيتابعنى وبيكتبلى كومنتات غريبة جدا يبان أنه مختل وفاكر أن هو مودى وأنا لارا ومصدق ده من ضمن أحداث المسلسل وكنت باخد الموضوع بضحك زى أى معجب الموضوع اتطور أنه بيعرف انا موجوده فين ويجيلى عند المكان اللى أنا فيه ومعاه خاتم ويقولى ده خاتم جوازنا !”
معجب تعدى على سائق إيرينا يسري
واستكملت إيرينا يسري حديثها قائلة: “الموضوع يبان كوميدى وبيضحك لأى حد مستمع وممكن الموضوع ميتصدقش أنما أنا عاملة سكرين شوت لكل كلامه واعترفاته بملاحقته ليا فى الأماكن و التهديدات وأنا مصوراه ب موبايلى و هو قدام عربيتى و بيهددنى أن أى حد يقرب منى هيقتله لدرجة أنه اتعدى على السواق الخاص بى بالضرب و جرى لما كنا هنكلم الشرطة !! انا معرفش بيعرف الأماكن اللى أنا فيها أزاى، الموضوع وصل بيا أن من خوفى لما اشوفه قدامى بيغم عليا فى الشارع وفى شهود وبيهرب فى ثانية لما الناس تتلم مش بنلحق نوديه القسم !!”.
إيرينا يسري تستغيث بعدما تعرضها للتهديد من معجب
واختتمت إيرينا يسري معاناتها قائلة: “الموضوع اتطور أكتر بما أنى دكتورة فى الأصل أنه بيروحلى مكان شغلى فى العيادة أو العيادات اللى كنت بشتغل فيها والمستشفيات وبيخلى منظرى وحش وسببلى مشاكل فى مكان شغلى !!!!!، هو الأكيد إنسان مختل هو فاكر أنى بحبه وعايش قصة وهمية فى عقله أنا مبقتش عارفة انزل شغلى ولا عارفة انزل فى مكان ولما بضطر انزل ببقى خايفه جدا !!!!!!!، انا زهقت وجبت أخرى الموضوع قعد شهور أنا مش عارفة أعمل ايه، و باعت لصحابى البنات انه عايز يعرف أماكن اى حد معجب بيا او بيحبنى عشان يقتله و يضربه، الموضوع وصل أن الناس اللى فى حياتى بقت تخاف تنزل معايا حتى السواق ساب الشغل معايا بعد ما اتضرب !”.
