"بيماطل ويتحجج".. جمال عبد الحميد يكشف كواليس أزمة زيزو مع الزمالك

أكد جمال عبد الحميد،  نجم الكرة المصرية السابق، أن مجلس إدارة الزمالك لم يتهاون في ملف تجديد عقد اللاعب أحمد سيد "زيزو"، موضحًا أن اللاعب هو من كان يماطل ويؤجل حسم موقفه.

عروض وهمية

وقال جمال عبدالحميد في تصريحات له عبر قناة أون سبورت: "إوعى حد يقول إن مجلس الزمالك قصر في ملف زيزو.. لما تيجي تقول للاعب تعالى جدد ونقعد، وهو قاعد يماطل ويتحجج بأن والده مش فاضي أو هو مسافر، أو معترض على بند معين علشان يخلي الوقت يعدي ويبقى فري".

وتابع: "ما حد يطلع يطلعنا ورقة بالعروض الوهمية اللي كنا بنسمعها من الخليج دي مره 6 مليون دولار، ومرة 10 مليون، والكلام الوهمي ده.. ما حد هيجي يقولك وقتها أنا جايلي عقد ب6 مليون دولار وعايز قد كدة علشان أجدد، ولكن هو هدفه يماطل.. فين العقود دي، مطلعتش ليه؟. وفين العروض دي دلوقتي".

تأثير السماسرة

وأضاف: "أنا محتاج أشوف وأنا بقول ليه كده لإني مقدرش ألوم مجلس إدارة الزمالك، وأنا معاهم ومساندهم، وعارف إن السماسرة بتلعب بكل الأندية".

واستكمل: "يجيي يقولك أنا جايلي عقد برقم كبير من برا وعايز رقم كبير علشان يجدد،  طيب يا ابني فين العروض دي دلوقتي ما تطلعها". 

واختتم: "هو في حد عاقل لاعب بياخد 18 و23 مليون جنية.. تيجي تجدد بكام؟.. تطلب 80 مليون،  هو ده كلام ناس عاقلة.. الزيادة ممكن تبقى 5 مليون يا سيدي 10 مليون، مش تقولي 80 مليون وإنت عندك 30 لاعب في الفريق هيعملوا إيه؟".

 إنذار "زيزو"

وفي السياق نفسه، أكد الإعلامي أمير هشام، أن نادي الزمالك أرسل إخطار رسمي إلى أحمد مصطفى زيزو، وإبلاغه باتخاذ الإجراءات القانونية ضده بسبب غيابه عن التدريبات الجماعية منذ عشرة أيام.

وقال عبر برنامجه "بلس 90" الذي يبث على قناة النهار الفضائية: "زيزو منذ استبعاده من مواجهة ستلنبوش في الكونفدرالية وهو متغيب عن التدريبات الجماعية للفريق الأبيض".

وأضاف: "الخصومات ضد زيزو وصلت لـ5 مليون جنيه، بسبب غيابه عن التدريبات وعدم امتثاله للتحقيقات أمام الشئون القانونية في النادي".

وأكمل: "الزمالك يركز في هذا الملف جيدًا، ويرى مسئوليه أنه من الممكن تحقيق مكتسبات والمطالبة بتعويضات من اللاعب".

وأتم: "مسلسل زيزو مع الزمالك لازال متواصل، واللاعب حسم مصيره بالانتقال للأهلي في الموسم الجديد".