أحمد موسى: صحة المواطن خط أحمر وقرارات حاسمة ضد الترويج الطبي المضلل

أكد الإعلامي أحمد موسى، أن صحة المواطن المصري خط أحمر لا يقبل العبث أو الترويج للخرافات، مشيدا بالتحرك السريع من الدكتور خالد عبد الغفار وزير الصحة، والمهندس خالد عبد العزيز رئيس المجلس الأعلى لتنظيم الإعلام، ونقابة الأطباء، لإيقاف مهزلة الفيديوهات المنتشرة للطبيب المتوفى ضياء العوضي، قائلا: «امبارح طالبت الفيديوهات دي تتشال وتتحذف من كل الصفحات، والنهارده طلع قرار واضح بمخاطبة الجهات المعنية لحذف أي فيديو، لأن اللي بيحصل ده جريمة تسببت في وفاة ناس».

الهجوم على مروجي الدجل الطبي

وأوضح أحمد موسى، خلال تقديمه برنامج «على مسؤوليتي» المذاع عبر قناة «صدى البلد»، أن الكارثة تكمن في استضافة غير المتخصصين لأشخاص يروجون لكلام يتنافى مع العلم، معقبا: «بتجيب دكتور بيدي كلام فارغ وأنت قاعد تسمع له وتطبطب عليه وتقول له معقولة؟ طب ما تقول له ده كلام فارغ لأنك مش متخصص، بتعملوا هبد زي اللي عملتوه في 2011 أو زي ما وقفتوا مع مرسي، ما هي مصيبة نفس الأشخاص كارثة، اللي وقف مع مرسي ده ممكن يعمل أي حاجة، كان بيشتغل في الإعلام ورجع يعمل لنا كوارث تانية تسببت في وفاة ناس».

انتقاد غياب التخصص والاعتذار

وقال موسى، إن الترويج لنصائح طبية خاطئة مثل المنع من شرب المياه هو نوع من "الخبل" الطبي، حيث قال حرفيا: «لما يقول حاجة بلاش الميه، ميه نشرب ميه، أطباء العالم كله والصحة العالمية بيقولوا الميه أهم حاجة في الدنيا تشرب لك 3.5 لتر في اليوم، أقول لك لا ما تشربش ميه؟ إيه الخبل ده؟، طب يا أخي اعتذر إن أنت عملت مصيبة، ضحكتوا على الناس وروجتوا دجل وخرافات سواء في الإعلام ولا مواقع التواصل، اطلعوا قولوا اللي عملناه مصيبة نعتذر، لكن هما بيكبروا وبلاقي ناس تدافع، تدافع عن إيه؟ دافع عن واحد بيموت الناس؟».

قرارات حاسمة للمجلس الأعلى للإعلام

وأشار الإعلامي أحمد موسى، إلى القرارات التاريخية التي اتخذها المجلس الأعلى لتنظيم الإعلام اليوم، مؤكدا أنها تضمنت إلزام جميع الوسائل الإعلامية والمنصات الرقمية بعدم تداول أي محتوى للطبيب المتوفى، وإحالة الروابط المخالفة للجهاز القومي لتنظيم الاتصالات لحذفها، مضيفا: «المجلس الأعلى للإعلام خد قرارات بحييه عليها، مصلحتنا هي المواطن المريض، ولازم يتاخد إجراءات مع أي حد فتح نافذة لهذا الدجل، اللي عمل بلبلة وخلى في ناس ماتت بسبب فساد ودجل وخرافات استخدم فيها بعض الإعلام لتحقيق مكاسب مالية، هنا وجب العقاب ووجبت المحاسبة».

لائحة جديدة لتنظيم ظهور الأطباء

وأضاف موسى، أن التنسيق جاري الآن لوضع قواعد صارمة للظهور الإعلامي الطبي، لافتا إلى أن «الموضوع مش هيصة، في قانون وفي احترام وفي حياة ناس، وبنشوف تنسيق بين المجلس الأعلى للإعلام ووزارة الصحة ونقابة الأطباء لإصدار لائحة تنظم الظهور الإعلامي للأطباء بما يتسق مع القواعد المهنية، مش أي حد يطلع يفتي، الطب ده طب مش ماتش كورة، إحنا مش أطباء، والموضوع لازم يرجع للمتخصصين لأن في ناس الإعلام بالنسبة لها كل حاجة ومصدقة أي كلام بيتقال».