بسبب عزيزة جلال.. محسن جابر: فايزة أحمد رفعت عليا الشبشب مرتين

كشف المنتج محسن جابر عن حقيقة رفع الفنانة فايزة أحمد الشبشب عليه وذلك بسبب نزول أغنية للفنانة عزيزة جلال في نفس وقت شريط الأخيرة، موضحا: « الفنانة فايزة أحمد رفعت عليا الشبشب مرتين مرة كان مع نزول شريط عزيزة». 

وأضاف خلال لقائه عبر برنامج «باب الخلق» مع الإعلامي محمود سعد المذاع على قناة النهار، « لما نزلت أغنية عزيزة جلال بتخاصمني حبه وتصالحني حبه كانت وقتها أول أغنية لعزيزة وفي نفس الوقت الأغنية نزلت مع نزول شريط فايزة أحمد». 

حاطط الصور والأفيشات

وأوضح: « فأنا حاطط الصور والأفيشات وكان في بينهم أفيش محطوط لعزيزة جلال في الشيبرد وهي ساكنه جمب الشيبرد على طول»، متابعا: « ولقيت فايزة دخلالي وماسكه الشبشب وبتقولي أنا عايزة افهم البت دي عملالك اي أصل بيسحروا». 

واستكمل: « نزلت وقتها تحت المكتب وقولتلها أنا مليش في الحاجات اللي بتقوليها دي». 

وفي سياق آخر، قال المنتج محسن جابر: «أنا عندي 3 قصائد كاملة للموسيقار محمد عبد الوهاب منزلوش لحد النهاردة، وعندي مكتبة كاملة من أناشيد محمد الكحلاوي وهناك جزء منها لم يتم طرحه حتى الآن».

وتابع محسن جابر، خلال استضافته في برنامج «باب الخلق» المذاع عبر شاشة النهار: «عندي أغاني كتيرة لفنانين منزلتش لحد انهاردة وهناك أغاني كثيرة لازم تكمل  فنيا عشان يتم طرحها».

وأكمل محسن جابر: «عندي أعمال لبليغ حمدي وعمار الشريعي ملهاش حل لكنها منزلتش لحد انهاردة». 

قال المنتج محسن جابر، أن والده كان من الضباط الأحرار وكان يعمل كمأمور ضرائب، مشيرا إلى أنه تخرج من كلية الحقوق ثم التحق بالجيش ووصل لرتبة نائب أحكام عسكرية.

وأضاف، أنه كان متدين دون تطرف، ودائما ما كان يشجع أولاده على الصلاة.

وتابع: «كنا بنقضي وقت من صلاة الفجر لحد ما نروح المدرسة بين صلاة الفجر وقراءة القرآن، وكان وهو نازل يخبط على جيراننا في العمارة علشان يصحوا لصلاة الفجر».

وفي سياق حديثه عن فترة مراهقته، أكد أنه  تعرض لحادث عام 1973 غيرت مجرى حياته، قائلا: «كنت وقتها في ثانوية عامة، ورايحين نتطوع في مستشفى في طنطا وكنا 4 اتنين ماتو وأنا اتكسرت لدرجة إني قعدت في بدلة جبس من 6 شهور لسنة في المستشفى، ودي كانت أول مره يستخدموا مسامير في العظام، وكان الحاجة الوحيدة اللي بتسليني هي المزيكا وكان عندي اسطوانات جنبي وكل اللي بيجي يزورني بيجيب معاه اسطوانات، وكنت لما بسمع صحاي أغنيةوتعجبهم ببيع الأسطوانة، بعدين بقيت أخلي اللي بيجيبلي يجيب 5 وأبيعهم، وأول تجارة ليا كانت في الجبس».