كانت معرضة للشلل.. أيمن سلامة يكشف تعرض زوجته لأزمة صحية مفاجئة
كشف الكاتب أيمن سلامة، عن تعرض زوجته لأزمة صحية مفاجأة، استدعت خضوعها لعملية جراحية، وكان ما بين الإمضاء على إقرار دخولها العملية رغم الخطورة بسبب ارتفاع نسبة سيولة الدم لديها أو تأجيل العملية والأمر الذي قد يعرضها للشلل.
وكتب أيمن سلامة عبر صفحته بموقع فيسبوك: "أصعب تجربة ممكن يمر بيها إنسان.. الخميس الماضي اتصل بي ابني مروان يبلغني أن مامته تصرخ من ألم بساقها وأنها لا تستطيع الوقوف ولا النهوض من مكانها واتفقنا على طلب الإسعاف واتقابلنا في مستشفى الشروق بالمهندسين..في الأول شكوا إنها جلطة بالساق لكن الأشعة والتحاليل في الطوارئ أكدت أنه لأ، عملوا أشعة على الضهر لقوا كسر بالعمود الفقري علما بأنها لا اتخبطت ولا وقعت ولا أي شئ، وقالوا لازم عملية فورا.
وأضاف أيمن سلامة: “لكن التحاليل أكدت إنها مش جاهزة للعملية، سيولة مرتفعة في الدم ونسب عالية في كل حاجة وزي ما اتقالي دي حالة ماينفعش تدخل عمليات، لكن استشاري المخ والأعصاب قال لو مادخلتش العمليات خلال 24 ساعة هاتكون معرضة لشلل تام ودكاترة التخصصات الأخرى بيقولوا دي ماينفعش تدخل عمليات ونسبة خروجها لا تزيد عن 50 % وعشت ساعات من الحيرة ودخلتني الفنانة نهال عنبر - اللي بشكرها من كل قلبي - مع خمس دكاترة استشاريين ونفس الكلام ..بتوع المخ والأعصاب بيقولوا لازم عملية فورا وبتوع التخصصات الأخرى يقولوا استحالة دي تدخل عمليات وبقيت مخير مابين تأجيل العملية لحد الحالة ماتتظبط وده معناه شلل مؤكد ومابين ريسك العملية اللي هامضي على إقرار إنها على مسئوليتي وأنهم بلغوني بالحالة كاملة وقالولي 50% تطلع سليمة”.
وتحدث عن موقف الدكتور أشرف زكي معه: “جالي الدكتور اشرف زكي اللي مهما شكرته لا يمكن أو فيه حقه، أصر يكون جانبي وقالي استخير ربنا وبعد المغرب شد على إيدي وقالي توكل على الله، هي هاتكون بين إيدين ربنا، وربنا ارحم مننا جميعا ودخل العناية لزوجتي وشد من أزرها وقالها هاتقومي وافتكري كلامي ده كويس ودخلت العمليات وخرجت قرب الفجر وكلنا علي اعصابنا لكن ربنا فعلا ارحم مننا جميعا”.
وعن وضعها الحالي كتب:" هي حاليا في الرعاية المركزة لكن الحمدلله الحالة بتتحسن وشالوا اجهزة التنفس الصناعي والف حمد لك يارب ، دعواتكم ان ربنا يتمم شفاها وربنا مايحط حد في الموقف اللي كنت فيه ، ومرة تانية وتالتة بشكر الدكتور المحترم الانسان اشرف زكي اللي فضل جانبي ساعات طويلة وكان معايا خطوة بخطوة وبشكر الفنانة نهال عنبر اللي جت المستشفى فورا والفنان احمد سلامة والفنان علي كمالو اللي جم ايضا المستشفى وكذلك كل اعضاء مجلس النقابة / الصديق ايهاب فهمي / الصديق اشرف طلبة / الصديق ايمن عزب / الاستاذ منير مكرم وكل الزملاء والاصدقاء سواء اللي اتصل او جالي المستشفي .. نسألكم الدعاء لزوجتي".
