بعد مزاعم فبركة حلقة إيمان وأحمد.. رضوي الشربيني: "معايا أدلة وهتحرك قانونيًا"
خرجت الإعلامية رضوى الشربيني عن صمتها لتوضح حقيقة مزاعم فبركة حلقة “إيمان وأحمد”، الحلقة السابقة من برنامج هي وبس، وذلك من خلال بث مباشر عبر حسابها الرسمي على موقع التواصل الإجتماعي فيسبوك.
حيث قالت رضوى الشربيني في هذا البث: “خرجت عشان أوضح للجميع حقيقة الكلام المنتشر، أحمد تواصل كتير جدا مع البرنامج، وقال أن عايز يصالح خطيبته من خلال البرنامج، ٢ من فريق الإعداد كلموا ايمان وأحمد، وكاتب الاسكريبت اللي هيترجم قصتهم لai كلمهم في اكتر من طرف سمعهم، واللي اتقال انهم مخطوبين، وفضلنا شهور بنتواصل يعني مش اتسرعنا فغلطنا أو مخدناش بالنا”.
أدلة رضوى الشربيني
وكشفت رضوى الشربيني عن الأدلة التي في حيازتها، حيث قالت: “اتطلب منهم صور البطايق وصورهم وشهادة وفاة والد أحمد وكل ده اتبعت وموجود عندنا، استاذة ايمان مضت على صحة بياناتها الشخصية، وهي باعتة بطاقتها مش مكتوب فيها ولا متزوجة ولا مطلقة يعني أنسة، ايمان بتعرف تقرا وتكتب ومضيت على إقرار أن الكواليس هيتم تصويرها سواء كانت هتتعرض أو لا، وأنها تقر أنها متحملة وحدها المسئولية القانونية عن كل قول لها، يا استاذة إيمان حضرتك مضيتي أنك لم تتقاضي أي أجر مقابل ظهورك معانا، يعني القصة قصتك والحكاية حكايتك وخطيبك هو اللي طلب مننا أنكم تطلعوا معانا، وانه يستعين بينا عشان تتصالحوا على بعض”.
رضوى الشربيني تتحرك قضائيًا
واختتمت رضوى الشربيني حديثها منوهة عن تحركها قضائيًا، حيث قالت: “معرفش يا استاذة إيمان حضرتك عملتي كده ليه، وأنتي بالنسبالي مش عدو، زي ما طلعتي تقولي أننا ادناكي فلوس وقولنالك تمثلي وتقولي كلام مش حقيقي أكيد في ناس تانية اديتك فلوس وقالتلك تقولي أنها كانت تمثيلية، الحلقة اتعرضت يوم التلات لاقينا منك فويس نوت بصوتك يوم الخميس وبتقولي أنك مبسوطة ان الحلقة كسرت الدنيا وانك طالعة تريند ورد عليكي استاذ احمد اننا كان نفسنا نصلح، وبعتي فويس نوت لاستاذ احمد ومامته ودي هتتقدم للقضاء، في شهود عيان شاهدين على وجودك بصفتك خطيبة استاذ أحمد وهما فضيلة الشيخ والدكتورة فريدة الشوباشي وشاهدين على كلامك وانتي بتقولي لو مامته صممت أنا هفسخ، وفي كواليس مطلعتش ومتصورة ومن حقي اذيعها بموجب الاقرار، انتي عملتي بلبلة على السوشيال ميديا، وعشان كده هلجأ للقضاء عشان أجيب حقي، بجد معرفش أنتي عملتي كده ليه”.
