لفتة إنسانية مؤثرة.. تلاميذ يكرمون عامل مدرسة بالفيوم في يوم تقاعده

في أول تعليق له بعد اللفتة الإنسانية التي أبكت قلوب الكثيرين، عبّر “طارق محمد”، عامل مدرسة بنوة الابتدائية بمحافظة الفيوم، عن سعادته البالغة بالمفاجأة التي أعدها له تلاميذ المدرسة، مؤكدًا أنه لم يكن يتوقع هذا التكريم الصادق من أطفال صغار جمعوا مصروفهم من أجل إسعاده.

وقال “طارق” في تصريح خاص لـ«نيوز روم»:" أنا لحد دلوقتي مش مصدق اللي حصل.. عمري ما تخيلت إن الأطفال دول يعملوا معايا كده. أنا كنت بشتغل بحب وإخلاص، وعمري ما استنيت مقابل من أي مسؤول أو شخص، لكن اللي شوفته منهم النهارده خلاني حاسس إن تعبي طول السنين ما راحش على الفاضي."

المدرسة بيتي

وأضاف:" المدرسة دي كانت بيتي، والولاد دول زي أولادي بالظبط.. كنت بحاول أساعدهم وأكون موجود جنبهم على قد ما أقدر، لكن اللي عملوه أكبر بكتير من أي حاجة أنا عملتها."

وأوضح أنه تأثر بشدة لحظة التكريم، قائلًا:" مكنتش قادر أمسك دموعي، حسيت إن دي أحلى هدية في حياتي، ومش هقدر أنساها أبدًا، وهفضل فاكرهم واحد واحد."

وأكد:" أنا بشكر كل طفل شارك حتى لو بحاجة بسيطة، لأنهم علموني درس كبير إن الخير لسه موجود، وإن المحبة الصادقة مفيش زيها."

واختتم حديثه برسالة مؤثرة قائلًا:" يارب يفرح قلبهم زي ما فرحوني، ويكرمهم في حياتهم، لأنهم عملوا حاجة كبيرة مش سهلة، وخلوني أطلع من شغلي وأنا مرفوع الراس وسعيد."

وكان تلاميذ مدرسة بنوة الابتدائية قد نظموا مفاجأة لعامل المدرسة بمناسبة بلوغه سن التقاعد، حيث قاموا بجمع جزء من مصروفهم لشراء هدية رمزية، في مشهد إنساني لاقى إشادة واسعة، وأكد أن التقدير الحقيقي لا يحتاج لإمكانيات كبيرة بقدر ما يحتاج إلى قلوب صادقة.