رنجة على مزاجك: طرق مبتكرة لتقديم الرنجة في شم النسيم
الرنجة مش بس طبق تقليدي في شم النسيم، لكنها واحدة من الأكلات لها شعبية خاصة وطعم مميز يخلّيها مفضّلة عند ناس كتير، وبالأخص المصريين وعلى قد ما هي أكلة بسيطة، إلا إن فيها تنويعات كتير تخلّي كل مرة طعمها مختلف، الرنجة مش بس أكلة موسمية، دي تجربة طعم تقدر تطوّرها وتقدمها بأفكار جديدة كل مرة.
في السطور الجاية، هنستعرض معاكم طرق مختلفة ومبتكرة لأكل الرنجة، تناسب كل الأذواق، من الكلاسيكي للمودرن.
الرنجة بالليمون والزيت (الطريقة التقليدية)
أبسط وأشهر طريقة بنشوي الرنجة على النار أو في الفرن، وبعد كده نقطّعها ونضيف عليها ليمون كتير، زيت، بصل أخضر، وفلفل حار حسب الرغبة، تتاكل جنب عيش بلدي وخس وخيار، ومعاها شوية بطاطس مسلوقة تبقى وجبة كاملة.
سلطة الرنجة بالخضار
طريقة خفيفة وصحية، بنقطع الرنجة بعد تنظيفها، ونخلطها مع خيار، جزر مبشور، فلفل ألوان، بصل، وبقدونس، نضيف عصير ليمون وزيت زيتون، وممكن نضيف حبوب الرمان أو ذرة صفراء للمسة جديدة.
رنجة بالطحينة
من الطرق المحبوبة جدًا، خصوصًا لمحبي الطعم الدسم، بعد تقطيع الرنجة، نخلطها مع طحينة، ليمون، ثوم مهروس، كمون، شطة، وشوية خل، بتتقدم كغموس بجانب العيش، الطحينة بتمتص ملوحة الرنجة وبتديها نكهة مميزة.
الرنجة في الساندوتشات
رنجة في ساندوتش؟ آه طبعًا! بنحطها في عيش كايزر أو شامي، مع شرايح خيار مخلل، خص، وطحينة، أو حتى مع مايونيز لمزاج مختلف،وجبة سريعة ومليانة طعم.
رنجة مع المكرونة
لناس بتحب التغيير، بنضيف قطع رنجة مشوية على مكرونة مسلوقة مع زيت زيتون وثوم وبقدونس (زي الباستا بالسردين لكن مصري)، أو ممكن نخلطها مع رز أبيض، بصل مقلي، وشوية عصير ليمون.
رول الرنجة بالتوست
أكلة شيك وسهلة في التقديم، بنفرم الرنجة ونخلطها مع جبنة كريمي أو طحينة، ونفردها على شرائح توست، ونلفها رول ونقطّعها حلقات صغيرة.
بيتزا الرنجة
للي بيحبوا المغامرة في الأكل، ممكن نحط قطع رنجة خفيفة على بيتزا مع جبنة موتزاريلا، طماطم، وزيتون وندخلها الفرن، الطعم مختلف، لكنه مفاجئ ولذيذ لمحبي النكهات القوية، وتنفع في العزومات أو كـ"سناك" سريع.
