تصريحات إبراهيم عادل بالكامل وحقيقة انتقاله إلى الأهلي

إبراهيم عادل.. تصدر اللاعب إبراهيم عادل، مؤشرات البحث العالمية، وذلك بعد تصريحاته مساء أمس الثلاثاء، والتي وضع من خلالها العديد من الأمور، لعل أبرزها موقفه من الانتقال إلى صفوف الأهلي بالصيف المقبل.

ويقدم موقع «نيوز رووم» خلال السطور التالية، تصريحات إبراهيم عادل بالكامل خلال ظهوره التلفزيوني أمس الثلاثاء.

تصريحات إبراهيم عادل

"في الإمارات الناس محترمة وكانت خطوة كويسة الانضمام للجزيرة، قد يعتقد البعض أنها ليست جيدة، ولكن بالعكس تماما، في يناير أنا مكنتش عايز اكمل عادي، وكنت حاسس إني عايز أطلع أوروبا، ومش عاوز ألعب في الإمارات".

"كان نفسي أطلع، وفي يناير سهلولي الموضوع، ومكنش عندي عروض في أوروبا، العروض كانت في أول الموسم، وبيراميدز كلموني والأهلي كلموني، وكلمني الأهلي بعد بيراميدز لما حسوا إن الدنيا مفتوحة".

"كنت مخلص كل حاجة مع بيراميدز، مع عمرو بسيوني وهو صديقي بره الملعب، وبحبه جدا وبتمنى ليه كل التوفيق".

"بصراحة حسيت إني مش عايز أرجع، وكنت عايز أقول بعد كل ده هسيب كل حاجة وأرجع، وده مش هدفي وليه أصلا طلعت من الأول، لذلك حاربت على الذهاب في أوروبا".

تفاصيل مفاوضات الأهلي

"الأهلي دخل وأنا بخلص في نادي في الدنمارك، وكلمني محمد النني ومكنتش برد على التليفون، وتقريبا كان فيه حد كلمه من الأهلي تقريبا سيد عبد الحفيظ كان عايز يكلمني، وأي حد هيكون عايز يلعب في الأهلي، ولكن كان عندي هدف اللعب في أوروبا، وقولت للنني أنا بخلص في أوروبا، والنادي ده كان عايزين من فترة حوالي 3 أو 4 سنوات قبل كده".

"حسام الزناتي كلمته قبل كده وكان شغال في لوجانو في سويسرا، عندما كنت في بيراميدز قبل ما أروح الجزيرة، وقدملي عرض وتم رفضه، مكنش فيه خيار غير الجزيرة".

"حسام الزناتي كلمني وإسلام وكيلي قالي إن حسام بيتواصل معاه، وقالي هو مش في لوجانو دلوقتي، هو موجود في نورشيلاند، وقولت له إنه من 4 سنين كانوا بيكلوني وقالي إن الناس عايزينك، وأنا انبسطت خاصة إنه نادي كبير وبيطلع لاعيبه بره في دوريات قوية".

"قعدت مع وكلائي واتكلمنا في كل حاجة، وقالولي لا ترجع مصر، رغم منحهم لي حرية الاختيار، وأنا قولت لهم إني عايز أطلع وصليت استخارة، وبعد ما خلصت كلمت عمرو بسيوني وقولتله أنا عايز أطلع أوروبا رغم إني خلصت كل حاجة مع بيراميدز، وقولتله إني عايز أوصل لحته بعيده وقالي إن بابنا مفتوح لو حبيت ترجع مصر".

حقيقة الانضمام للأهلي

"النني تواصل معي في الفترة الأخيرة من مرحلة تعاقدي مع نورشيلاند، وقولت له سلملي على الكابتن سيد وكان عايز يعمل معايا مكالمة فقولت له مش عايز أتكلم في حاجة ممكن متحصلش دلوقتي، وقولت له أشكره وشرف كبير اللعب للأهلي بس أنا عايز أخد خطوة الاحتراف".

"أنا باخد فلوس في نورشيلاند أقل بكتير جدا من اللي باخدها في بيراميدز والجزيرة، أقل بكتير جدا، ولم أتحدث مع الأهلي في أي شئ أو أي أمور مادية".

حلم الاحتراف

"أنا مكنتش عايز أروح أصلا الإمارات في الأول، واتقالي في بيراميدز هتقعد باقيلك 3 سنين، لا هتكمل في النادي لا هتروح الجزيرة، كنت باخد عقد قليل جدًا جدًا في بيراميدز، فيه لاعيبه مكنتش بتلعب بتاخد أرقام أكتر مني، بس أنا كنت راضي وكانوا بيكفوني والكل كان مرضي الحمد لله، وكنت مبسوط جدا جدا".

"عرض لوجانو كان برقم كبير جدًا بـ 3 مليون دولار، والعرض اتبعتلي وأنا بعته لبيراميدز، ومعرفش الرقم اللي اتباعت بيه للجزيرة، ومعرفش تمت ازاي، وانضممت للجزيرة رغبة في الانتقال لـ أوروبا من هناك، واتفقت معاهم قبل التوقيع إن في حال وجود أي عرض أوروبي همشي لأني جاي هنا مرحلة تخليني أحترف في أوروبا".