كان بيودعنا بالأغنية.. نجل الموسيقار عبدالوهاب يكشف أصعب موقف مع والده

روى نجل الموسيقار محمد عبدالوهاب كواليس خاصة ومؤثرة حول أغنية “من غير ليه”، كاشفا تفاصيل لحظة سماعه اللحن لأول مرة داخل منزل والده، ورد فعله تجاهه.

صومعة عبدالوهاب

وقال خلال لقائه مع الإعلامية منى الشاذلي: “مرة كنت عنده بالليل، وكنا قاعدين لوحدنا خالص، فقال لي تعالي، ودخلني أوضة صغيرة أنا كنت مسميها الصومعة، كان فيها أورج وعود وتسجيلات”.

وأضاف: “قعد يدور لغاية ما قال لي اسمع، وشغل من غير ليه من أولها، وهو لما يسمع حاجة لازم يشغلها بصوت عالي جدا، لدرجة تحس إن الصوت بيطلع من جواك”.

من غير ليه

وتابع: “قعدت ساكت ومبهور، الأغنية كانت طويلة حوالي 25 دقيقة، وبعد ما خلصت أنا دمعت وبكيت بصراحة، فقال لي مالك؟”.

وأوضح: “قلت له مش عارف أقولك إيه، هي مش أحلى حاجة عملها، بس حسستني إنه بيودعنا، كأنها آخر حاجة هيعملها بصوته”، وأشار : “أنا ماحبتش الأغنية بسبب الإحساس ده، لأنها كانت بتفكرني بوقت صعب”.

وكشف أيضا كواليس الجدل حول تقديم الأغنية، قائلا: “كان فيه كلام إنه رفض يديها لأي مطرب غير عبد الحليم حافظ، وقال لو هتتعمل تبقى بصوته هو، لكن اللي أنا أعرفه إن أغلبها كان متسجل بصوته من السبعينات”.

وأضاف: “حتى البروفة اللي اتصورت مع الإعلامي مفيد فوزي، دي ماكنتش بروفة حقيقية، دي كانت تسويق للأغنية، لأنه عمره ما كان بيدخل حد بروفاته”.

وأوضح: “هو كان بيسوق للأغنية بطريقة ذكية جدا، والجمهور افتكر إنها بروفة عادية، لكن الحقيقة كانت جزء من خطة لتقديم العمل”.