الاتجاه لتقليل الكليات حسب احتياجات السوق.. هل يخدم الطلبة أم يزيد الضغط؟

بدأ الدكتور محمد كمال كلامه بتوضيح إن الدولة لسنوات طويلة كانت بتتبع سياسة التوسع المتعمد في أعداد الطلاب المقبولين بكليات العلوم الإنسانية والنظرية، مشيرا إلى أن ذلك كان يحدث دون أي دراسة حقيقية لمدى توافر فرص عمل ليهم في السوق أو احتياج المجتمع ليهم.

التعليم يحتاج إلى مبالغ ضخمة

أضاف “كمال” أن السبب الحقيقي وراء هذه السياسة حسب وصفه هو التوفير، فالدولة بقالها أكتر من 20 أو 30 سنة مش عايزة تصرف مبالغ ضخمة على التعليم، والفرق هنا إن كليات زي الطب أو التمريض بتحتاج بناء مستشفيات جامعية، وكليات الهندسة محتاجة معامل وورش وتدريب عملي بأعداد قليلة عشان الجودة، وده بيكلف الدولة مبالغ طائلة.

وتابع: لكن في المقابل، كليات زي "تجارة" مثلاً مش محتاجة أكتر من مدرج كبير، وممكن الدولة ترمي فيه بالـ 70 والـ 80 ألف طالب من غير أي تكاليف إضافية تذكر، وهو ده اللي كان بيحصل لتسكين الأعداد وخلاص.

الانتساب الموجه وزيادة الأعداد

انتقل الدكتور محمد كمال لنقطة تانية مهمة وهي نظام "الانتساب الموجه"، وأوضح إن النظام ده في بدايته كان مخصص "للموظفين" فقط اللي فاتهم قطار التعليم وعايزين يكملوا دراستهم وهم بيشتغلوا، فكانوا بيدرسوا بنظام الانتساب.

وتابع: لكن اللي حصل إن الباب ده اتفتح لطلاب الثانوية العامة والدبلومات في نفس سنة تخرجهم، وبقى الطالب اللي مجموعه مش جايب "انتظام" بيقدر يدخل الكلية "انتساب موجه" من خلال مكتب التنسيق، ومبيكونش ملزم بالحضور أو غيره.

وواصل: كانت النسبة المقررة لطلاب الانتساب هي 25% فقط من إجمالي المقبولين في الكليات النظرية. يعني لو تجارة القاهرة هتاخد 10 آلاف طالب، يبقى نصيب الانتساب منهم 2500 طالب بس.

نسبة الانتساب الموجه من 25% إلى 50%

من جانبه، قال الكاتب الصحفي رفعت فياض، الفترة التي تحدث اتكلم عنها الدكتور محمد هي فترة تولي الدكتور سيد عبد الخالق، وزير التعليم العالي الأسبق، المسؤولية، متابعا: وقتها حب "يراضي المجتمع" ويطمن الناس إن فيه مكان لكل طالب في الجامعة، فقرر رفع نسبة الانتساب الموجه من 25% إلى 50% من إجمالي المقبولين في الكليات النظرية.

وانتقد الدكتور هذا التوجه، ووصفه بـ "مراضية الناس على حساب الحقيقة"، لأن الزيادة الضخمة دي في الأعداد داخل الكليات النظرية مكنتش مدروسة، وهدفها كان مجرد استيعاب الطلاب في منظومة تعليمية مش هتوفر لهم وظائف في المستقبل، بدل ما يتم توجيه الدعم والتركيز للتخصصات اللي السوق محتاجها فعلاً بس مكلفة للدولة.