مساعد رئيس الوزراء: طرح شركات مملوكة للدولة في البورصة «قيد مؤقت»

كشف هاشم السيد، مساعد رئيس مجلس الوزراء، تفاصيل خطة الحكومة بشأن إدراج عدد من الشركات المملوكة للدولة في البورصة المصرية، مؤكدًا أن ما يتم حاليًا هو “قيد مؤقت” وليس طرحا للبيع كما يعتقد البعض.

طرح ولا حوكمة؟

وقال السيد خلال مداخلة ببرنامج “اليوم هنا القاهرة” على قناة “مودرن إم تي أي”: “هو مش طرح… أنا بأكد دايمًا وبقول إن احنا عشان نعمل حوكمة لدور الدولة في النشاط الاقتصادي وحوكمة للشركات ذاتها، فإحنا هنبدأ نقيدها ببورصة الأوراق المالية، وده تغيير في منهجية برنامج الطروحات.”

وأضاف أن الحكومة تعمل منذ عدة أشهر على إعداد برنامج وطني متكامل، موضحًا: “بقالنا 3 أو 4 شهور بنرتب لبرنامج وطني… مافيش حد بيقولنا نعمل إيه، إحنا عندنا منظومة وطنية لحصر وتنظيم الشركات المملوكة للدولة.”

تنشيط البورصة المصرية

وأوضح أن الهدف من هذه الخطوة هو تنشيط البورصة المصرية وزيادة رأس المال السوقي، قائلًا: “البرنامج الوطني هدفه تنشيط بورصة الأوراق المالية المصرية وزيادة رأس المال السوقي.. إحنا النهاردة بنحط الشركات على شاشة التداول علشان الناس كلها تشوفها، برنامج شفاف تمامًا.”

وأشار إلى أن اختيار الشركات يتم وفق معايير محددة، موضحا: “المعايير اللي إحنا عايزينها هي الشركات اللي تتوافق مع قواعد القيد… في شركات ممكن تحتاج تعديلات في نظامها الأساسي أو موافقات معينة، وده اللي بنشتغل عليه.”

القيد المؤقت يعد المرحلة الأولى فقط

وأكد أن القيد المؤقت يعد المرحلة الأولى فقط، مشددًا: “القيد المؤقت ده مرحلة.. بعدها بنقيم الشركة ونسجلها في الهيئة العامة للرقابة المالية، وده بياخد من 4 لـ5 شهور، وبعد كده بييجي الطرح، يعني لا يوجد طرح في هذه المرحلة.”

وتابع أن الخطة تستهدف مختلف القطاعات وليس قطاع البترول فقط، قائلًا: “هنشتغل على كل القطاعات… البترول، النقل، البتروكيماويات، الأدوية وغيرها، وعلى مدار 6 شهور هنكون بنعرض نماذج من كل القطاعات على شاشة التداول.”

القيد في البورصة.. والحوكمة السريعة

وأكد أن الهدف الأساسي هو تحسين أداء الشركات وزيادة شفافيتها، موضحًا: “القيد في البورصة هو حوكمة للشركة وإفصاح عنها، وده بيدفع إدارتها لتحسين اقتصادياتها… وإحنا مهتمين جدًا بالحوكمة السريعة للشركات.”