تصريحات ساخرة من ياسمين عز عن الفسيخ: «استحمي قبل النوم»

قالت الإعلامية ياسمين عز: «بمناسبة الربيع أو عيد الفسيخ بننصح الناس متتقلش ومتجيش واحدة تقول منتهي الصلاحية، صلاحية إيه يا مدام؟ هو أصلًا سمكة متعفنة متهللة، ياريتها منتهي الصلاحية، ده هو عدى مرحلة الصلاحية وطلع منه دودو صغنطوطو، كلي ما تبقى من الجثة بقى ودخلي البكتيريا النافعة والغير نافعة خليهم يتقابلوا ويعملوا كومباوند مع بعض، ويا سلام لو أنتِ حامل في الشهر الثالث، يسلوا النونو».

وأضافت ياسمين عز خلال حلقة اليوم من برنامج «كلام الناس» المذاع عبر شاشة MBC مصر: «يا شيماء أنتِ مش شايفاني؟ أنتِ مش شايفة غير الرنجة، وعقلك بقى بطروخة وهتاكلي لحد ما يغمى عليكي 15 رغيف بلدي ولا يهزك احتباس الأملاح».

سوشي أحسن

وتابعت: «كان ربنا هداكي وأكلتي سوشي، إيه اللي رجعك تاني للفسيخ؟ أنتِ نايمة حاضنة فسيخة من كتر ما وحشاكي، وأنتِ وأخواتك بتسرقوا من بعض البطارخ».

وأردفت: «أبقي علقي في بوقك فواحة علشان ولا معجون هينفع ولا نعناع هيشفع، هتطلعي الريحة من بيتكم إزاي وزيت الرنجة اللي بينبعث هتطلعيه إزاي، وهتفضلي تنتقديني لما أقول لك جوزك ريحته مسك العنبر وأنتِ ريحتك فسيخ وداخلة فيها بضوافرك، الله يسترك استحمي قبل ما تنامي».

مبادرة تيسير الجواز

وفي سياق آخر، علقت الإعلامية ياسمين عز عن مبادرة تيسير الجواز في المنيا.. المؤهل العالي ١٥٠ جرام دهب والمتوسط ١٠٠ جرام.. قائلة: شفتي يا شيماء كنت بقولك ذاكري ليه عشان تلهفي الدهب.

علقت الإعلامية ياسمين عز على مبادرة "تيسير الزواج في المنيا، قائلة: المبادرة بتقول إن لو العروسة مؤهلات عليا يبقى 150 جرام دهب ولو دبلوم يبقى 100 جرام دهب.

ياسمين عز تسخر من مبادرة تيسير الزواج

وتسائلت: طب لو هي دبلوم وبعدين كملت وخدت مؤهل عالي مين هيحاسب على الفرق كده.. كده في 50 جرام دهب ضايعين. 

وواصلت، خلال حلقة اليوم من برنامجها "كلام الناس على إم بي سي مصر، لو العروسة معها معهد سنتين مؤهل متوسط لا هو قليل ولا هو عالي هنعمل اي هنقسم البلد نصين ونحسب الفرق بين 100 جرام و 50 جرام ونقسمهم على 2 لأن المعهد سنتين فتبقى الحسبة 32 جرام دهب! طب لو هي فوق متوسط محددش يتقدملها بقى.