الإعلامي أحمد سالم يهنئ الأقباط بعيد القيامة المجيد.. الوطن يجمعنا بكل إخلاص
استهل الإعلامي أحمد سالم حلقة اليوم من برنامجه “كلمة أخيرة” بتقديم التهنئة للإخوة الأقباط، "كل سنة وحبايبنا وأهلنا وشركاءنا في الوطن الاخوة الاقباط المسيحيين بمناسبة عيد القيامة المجيد.
الوطن يجمعنا
وقال “سالم”: "شيء رائع إن شريكك في الوطن حبيبك وصاحبك المسيحي واللي كان معاك في الجيش ومعاك في المدرسة وحاربوا سوا في أكتوبر وقبل كده في كل الحروب واللي بقالوا آلاف السنين كلنا جنس واحد ده بقى مسيحي ده مسلم ده حر في دينه كل واحد حر في دينه ولكن يبقى الوطن بيجمعنا بمنتهى الحب بمنتهى الاخلاص، وواصل: كل سنة وكل مسيحيين مصر طيبين.. عيد سعيد عليهم.
ده اسمه تنطح
وتابع: هعلق تعليق بسيط كده يعني البعض أو قلة من المسلمين يدخل على صفحات إخواننا المسيحيين ويكتب لهم كلام لا علاقة له بالعيد وكأنه يدعوهم للإسلام يعني وفقا لشهادة علماء الدين المسلمين ده مش من الاسلام في شيء ده اسمه تنطح ممكن يجيب مشاكل، مناشدا: يا جماعة دوروا علي يجمعنا مش اللي يفرقنا سهل جدا انك تخسر اي حد سهل جدا انك تدور على نقاط الخلاف لكن الاجمل انك تدور علي اللي يجمعك، تفرح لفرحة اخ حبيبك او اخوك من غير ما تكون انت موافق على سبب الفرحة نفسه او عندك قناعة انت بتفرح لفرحه وبتحتفل بعيده.
ترحم على زميلك المسيحي
وأضاف: هي دي مصر وده اللي موقف مصر على حالها لغاية النهارده مع كل الاحترام لكل الدول القريبة والصديقة والمجاورة أول حاجات وقعت الدول دي هي فكرة الطائفية سواء داخل الدين الاسلامي او ما بين الاديان المختلفة وده مش موجود عندنا وده هيفضل عنصر القوة الرئيسي في مصر بلاش، وأضاف: ترحم على صاحبك او زميلك المسيحي على السوشيال ميديا ومتكتبلوش كلام غير لاق يتقول له كله سنة وانت طيب يا ما تقولش حاجة خالص وهو راضي ومش زعلان والاجمل انك تشاركه.
