تريند المدرسين يثير الجدل على فيس بوك.. القصة كاملة
حالة من الجدل أثيرت على وسائل التواصل الاجتماعي خلال الساعات الاخيرة بعد انتشار فيديوهات " تريند المدرسين" ، الذي يفتح فيه المعلم يده ليضع فيها الطلاب الحلويات والهدايا في نهاية الحصة.
تريند المدرسين ، انقسمت حوله الاراء على موقع التواصل الاجتماعي فيس بوك بين مؤيد ومعارض ، حيث قالت نرمين محمد : مش قادرة اشوف تريند المدرسين غير أنه قلة قيمه للمدرس ، يعني ايه مدرس يقف فاتح أيده لتلميذ عاوز ياخد "شوكلت أو شيبسي أو اي حاجة" ، ده زمان كان المدرس يمشي في جيبه اي حاجه حلوه عشان هو اللي يهادي الطلبة وده بيكون للطالب الشاطر بس ، اه كان في تكريم للمدرس اللي بنحبه بس ده مثلا كان ف حفله في عيد ام ف اختيار المدرسه المثالية ، لكن اللي بيحصل دلوقت ملوش تفسير غير انو قلة قيمة.
وقالت أمينة أحمد : تريند المدرسين ده عبارة عن تقدير للمعلم في زمن قل فيه التقدير جدا ، والمعلم مش بيفتح أيده عشان عايز ياخد منهم حاجه الطلاب هما اللي عايزين يدوله ، كفاية أن المدرس يعرف أن له معزه ف قلب تلاميذه ، الموضوع بسيط وجميل
معلمون يعلقون على تريند المدرسين
من جانبه قال شريف لطيف يوسف : بالأمانة لم أكن أعلم عن تريند المدرسين أي شيئ ، حتى فاجأني طلابي هذا الأسبوع به ، وإعتقدت في البداية انه نوع من التهريج لتضييع الوقت وبدأت أغضب ، لكني اكتشفت انهم متفقين مسبقا انهم يفاجئوني به تعبيرا عن حبهم وتقديرهم
وأضاف قائلا : بصراحة حب الطالب وتقديره لمدرسه هو أعظم مايكون في مهنة التدريس وهذا الحب لايقدر بثمن ، ولكني كنت أفضل ان يكون التعبير عن الحب بالاجتهاد والحصول على أعلى الدرجات في مادتي بعيداً عن الحلويات والهدايا والتريندات لكن مشاعرهم واحساسهم وصلوا وكانوا نابعين من حب وتقدير حقيقيين.
وقال مازن الخديوي : تريند المدرسين جاي فى وقته ، لإن أى مدرس (وانا بتكلم عن نفسي) محتاج حاجة زى كدة تفرحه وتطبطب عليه وتقوله شكراً لتعبك إحنا بنحبك وعارفين انك بتعمل كل اللى في استطاعتك عشان مصلحتنا ، وكل واحد فينا كمدرسين عارف هو شغله اى وعامل ازاى وبيقدر قيمه نفسه كويس خصوصاً إنى بعتبر طلابى هم عيلتى الكبيرة
وقالت أسماء نوفل : احنا في تريند المدرسين بنشوف وجهات نظر أغلبها بتبين الحقد والاستكتار اللي على المدرس بأن يتعمل له حاجه تفرحه ، رغم أنها ومن وجهه نظري بسيطه ومش مكلفة ومفيش حد مجبر يعملها ، ما تسيبو الناس تفرح
اتحاد أمهات مصر يرفض تريند المدرسين
عبرت عبير أحمد، مؤسس اتحاد أمهات مصر للنهوض بالتعليم، وائتلاف أولياء الأمور، عن رفضها لـ تريند المدرسين الذي انتشر مؤخرا بين الطلاب وأولياء الأمور على السوشيال ميديا، والخاص بالمعلمين، قائلة :"لا أفضل فكرة التريندات التي توجه الأشخاص الي تصرف ما، وانتشاره على صفحات السوشيال ميديا".
وتابعت: "لو طالب اشتري هديه سواء حلوي أو ورد أو تذكار، واعطاه لمعلمه في عيد ميلاده أو في عام جديد أو أي مناسبة بشكل عام، من تلقاء نفسه بعيدا عن تريند المدرسين ، فهذا الأمر سيكون مقبولا وايجابيا، ولكن عندما يقوم الطالب بهذا الأمر لأنه تريند على السوشيال ميديا، فهذا من وجهة نظري أمر غير مقبول".
ائتلاف أولياء أمور مصر يشيد بـ تريند المدرسين
بينما قالت داليا الحزاوي مؤسس ائتلاف اولياء امور مصر ، ان تريند المدرسين هو تريند ايجابي مبهج
وأضافت داليا الحزاوي : أن تريند المدرسين المتداول حاليا على السوشيال ميديا جعل الطلاب يعبرون عن تقديرهم وامتنانهم للمعلم عن طريق إعطاءه الشيكولاتة والحلويات ، والجميل أنه لم يقتصر ذلك علي طلاب المدارس فقط بل امتد الي طلاب الجامعات .
وتابعت الحزاوي : المعلم يحتل مكانه كبيرة في قلوب الطلاب فهو مثال للقدوة الحسنة التي يحتذي بها كل طالب ، لذلك يقع على المعلم مسئولية التحلي بالفضائل والخصال الكريمة ، كما ان للأهل دور في زرع احترام وتقدير المعلم في نفوس الابناء ، وبالتالي فلابد من تشجيع الابناء على شكر المعلمين دائما وابدا
واختتمت الحزاوي ؛ بالرغم من وجود بعض الاصوات التي ترصد تحفظاتها على تريند المدرسين و لكن علينا أن ندعم التريندات الإيجابية لعلها تنتشر بدلا من التريندات السلبية المؤسفة ، وشددت على أن تريند المدرسين يشجع على التقدير و المحبة والترابط
