خبير تسويق: «كذبة أبريل مش مجرد هزار.. بـ لِبن علمتنا درسا ذكيا من قصة بيسو»

كشف خبير التسويق المصري صلاح أبو المجد، حقيقة الاستغناء عن بيسو عضو فريق «بـ لبن»، بعدما أثار جدلا واسعا خلال الأيام الماضية على السوشيال ميديا.

وفي منشور عبر فيس بوك، وصف صلاح أبو المجد ما حدث مع شركة بلبن خلال كذبة أبريل بأنها أقوى من أي كذبة، مشيرا إلى أن نجاح الحملة لم يكن محصورا في الإعلان أو الميزانية، بل في الفكرة الذكية، التوقيت المناسب، والجرأة في التعبير.

وقال صلاح أبو المجد إن ما فعلته بـ لِبن لم يكن مجرد منشور عابر أو هزار، بل كان حوارًا مع الجمهور، دفع الناس للتفاعل، والتحليل، وإعادة نشر القصة: «كدبة أبريل بس الحقيقة كانت أقوى من أي كدبة، كدبة أبريل بالبستاشيو من بلِبن، اللي حصل مش مجرد بوست، ولا هزار عابر، ولا حتى تريند وخلاصن اللي حصل إن بلِبن لعبها صح جدا، ورجع نفسه للتريند من باب محدش كان متوقعه».

وأضاف: «بوست بسيط، جملة مستفزة، اسم معروف، وكدبة أبريل في توقيت مظبوط، وفجأة، السوشيال ميديا كلها بتتكلم، ناس زعلت، ناس فرحت، ناس حللت، وناس دخلت على التريند، وكلهم بيكتبوا نفس الاسم بلِبنن ودي النقطة اللي ناس كتير مش واخدة بالها منها: مش مهم الناس بتحبك ولا لأ، المهم إنهم بيتكلموا عنك».

كذبة أبريل.. الاستغناء عن بيسو 

وتابع: «المشكلة إن أغلب الناس فاكرة إن التسويق محتاج فلوس، إعلانات، ميزانيات، حملات بس الحقيقة؟ محتاج فكرة، توقيت، وشوية جرأة، بلِبن ما عملش إعلان، بلِبن عمل حوار، خلى الناس هي اللي تكمل باقي القصة، وتنشرها، وتعيدها، وتكبرها وده أقوى نوع تسويق موجود دلوقتي».

واستكمل: «لو عندك شغل أو براند، اسأل نفسك: إيه الحاجة اللي تخلي الناس تتكلم عني مش بس تشتري مني؟ فكرة فيها جدلن بوست فيه جرأة، توقيت ذكي، قصة تتحكى، لأن في 2026 اللي بيبيع بس بيتنسى، واللي بيتحكى عنه بيكسب، كدبة أبريل خلصت بس اللي فهم اللعبة مش بيهزر».

وأثارت بـ لبن موجة واسعة من الجدل بعد إعلانها الاستغناء عن «بيسو»، قبل أن تتصاعد التساؤلات حول حقيقة ما حدث، خاصة مع تزامن القصة مع أجواء كذبة أبريل، ما دفع البعض لاعتبارها جزءا من حملة دعائية ذكية وليست قرارا حقيقيا.

وقالت الصفحة الرسمية لبراند الحلوى «بـ لبن» على موقع التواصل الاجتماعي فيس بوك: «تم الاستغناء عن بيسو بعد رحلة طويلة كان فيها بيسو واحد من أهم الوجوه اللي أثرت في نجاح بـ لبن في الوطن العربي، حبينا نوضح إن الشركة كان ليها دور كبير في التحول اللي حصل في شخصية بيسو من بائع آيس كريم لأهم واجهة في الوطن العربي».
 

تفاصيل استغناء بلبن عن بيسو 

وتابعت الصفحة الرسمية للبراند المحلي: «وبالرغم من ده، كل حاجة وليها نهاية، بنتمناله كل الخير في اللي جاي وربنا يبارك له في بنته وبيته».

وبعد نشر البيان الذي اعتبره البعض خدعة تسويقية ذكية، نشر بيسو على صفحته الرسمية على موقع فيس بوك، مقطع فيديو مؤثر: «مش عارف أبدأ منين، الخبر كان صادم لكن الحمدلله أنا مش زعلان، بـ بلن كان سبب اللي أنا فيه، وعمره ما قصر معايا في حاجة، ما تقولش حاجة حلوة قول بـ لبن».