رحل سكرتير المدرسة.. مجدي الهواري ينعي سليمان عيد بطريقة "الناظر"
نعى المخرج مجدي الهواري، الفنان الراحل سليمان عيد، الذي توفى صباح اليوم عن عمر ناهز 56 عامًا إثر أزمة صحية مفاجئة.
وكتب الهواري خلال حسابه الشخصي على موقع التواصل الاجتماعي "فيس بوك" قائلًا: "رحل سكرتير المدرسة ورحل الناظرعاشور وصلاح وسيد ضاهي والاستاذ حسين ومس انشراح والاستاذ درديري، الإدارة كلها الله يرحمهم جميعاً وفضلت المدرسة ( الحياة ) الذكرى الحلوة والأيام الحلوة والتفاصيل الحلوة والعمر بقي ورا مش قدام حزن وقهرة ووجع".
وتابع الهواري، "درس جديد من المدرسة بيعلمنا إن مفيش كبير مفيش أفيش ولا أسماء مين ولا فين مكانها ولا أجرك كام ولا بتجيب كام فيه، آية ربنا عايز يقولنا فيها حاجة، وهي ولا حاجة بتفيد! بس هو عملك المفيد والتوحيد والتسبيح والعبادة والصلاة والصداقة تكون من قلبك لصحبك وروحك وطيبتك وأخلاقك كله قاعدلك ويظهرك في يوم زي ده ماشاء الله زي الفل وكله عندك ياسليمان ونشهد".
وواصل الهواري، "ودعانا كلنا علشان نصلي يوم الجمعه مبروك عليه يومه، دعانا كلنا علشان نصلي عليه، علشان نفرح بيه ونفرح له ونشهدله إنه طيب وسليم وقلبه نضيف، أحلي ختمة وختام وخاتمة ربنا يكتبهلنا كلنا، وساب رسالة قوية لينا كلنا ! عبارة عن (آية ) بتقول الآيه لوعايز يومك يبقي حلو كده ! والناس كلها تصلي عليك، خليك كويس مع الناس طول عمرك ! وده سليمان عيد وأسلك وخليك في حالك ! وده سليمان عيد وسيرتك تبقي حلوة وميختلفش عليها اتنين في الخير ! وده سليمان عيد ونشهد كلنا بكده عمره مزعل حد حتي لو فكر يعتذر عن دور وده أقل حقوقه ! كان يخاف يزعل مننا حد الله يرحمك ياسليمان مصر كلها زعلانة عليك مش احنا بس ديه علامة ياواد افرح بقيت آية لينا كلنا! كان نفسك فيها يابني في حياتك تبقي في وسطينا مرة (قدام) خدتها يا سليمان وبقيت قدمنا كلنا الكبار والنجوم والصغيرين كله بقيت له آية".
واختتم الهواري، "في أهم مشهد لينا كلنا انت بطله إفرح ياعم صبرت ونولت ياابني وبشدة ! هنفتكرك طول الوقت وبشدة ! غصب عننا وضحكت علينا كلنا وبشدة وفوزت بالجنة إن شاء الله وبشدة وجعلك الله لنا آية وبشدة لن ننساك وبشدة مع السلامة وبشدة الله يرحمك وبشدة".
آخر أعمال سليمان عيد
ويُعرض للفنان الراحل سليمان عيد في السينما خلال الفترة الحالية، فيلم "سيكو سيكو" بطولة طه الدسوقي وعصام عمر، والذي يحقق نجاحًا كبيرًا في شباك التذاكر، والعمل من بطولة النجمين الشابين عصام عمر وطه دسوقي، ويضم كل من علي صبحي، باسم سمرة، خالد الصاوي، تارا عماد، ديانا هشام، أحمد عبد الحميد، ومحمود صادق حدوتة، ويأتي الفيلم من تأليف محمد الدباح، ومن إخراج عمر المهندس، ومن إنتاج شركة Film Square للمنتج السينمائي أحمد بدوي.
كما يُعرض للراحل فيلم فار بـ 7 ترواح، والذي شارك في بطولته، مع إدوارد، فرح الزاهد، محمد أوتاكا، عنبة، ندى موسى، لينا صوفيا، أحمد فتحي، محمد لطفي، محمد رضوان، أحمد فتحي، محمد أوتاكا، وتأليف محمد فاروق شيبا، وإخراج شادي علي.
