فيدرا في أحدث منشوراتها: "اسألوا على اللي حواليكم بجد مش سؤال عابر"
أثارت الفنانة فيدرا الجدل بعد نشرها منشور غامض تطلب فيه من جمهورها أن يسألوا عمن حولهم بشكل حقيقي وليس بسؤال عابر، وذلك عبر حسابها الرسمي على موقع التواصل الإجتماعي فيسبوك.
فيدرا تدعو الناس للتقرب من بعضهما
وقالت فيدرا في منشورها: “في الفترة الأخيرة بقيت ألاحظ قد إيه في ناس حوالينا بتمر بظروف صعبة وساكتة، ناس شكلها كويس بتضحك بتتكلم عادي لكن من جواها تعبانة جدًا، بقينا نسأل بعض “إزيك؟” بشكل تلقائي سؤال عابر ورد تلقائي: “الحمد لله”، لكن حقيقي، لازم نسأل بجد، نسأل ونستنى الإجابة، نسأل ونبقى مستعدين نسمع، خصوصًا لو عارف إن حد قريب منك عنده مريض في العيلة، أو حد فقد شخص بعد فترة مرض طويلة، الناس دي بتكون شايلة فوق طاقتها، وغالبًا مش هتطلب حاجة، اسألهم: إنت كويس؟ محتاج حاجة؟ أقدر أساعدك في حاجة؟، واسأل بجد مش مجرد مجاملة، أحيانًا كل اللي الناس محتاجاه إن حد يسأل، ويسأل بصدق، الكلمة ممكن تفرق جدًا، أكتر ما إحنا متخيلين، طبعًا مش سهل نطبق ده مع كل الناس، خصوصًا المعارف البعيدة، لكن ليه لأ؟ يمكن حتى محاولة صغيرة تفرق مع حد”.
“الناس شكلها بخير بس هي مش بخير”
واستكملت فيدرا حديثها قائلة: “أنا قابلت ناس كتير الفترة اللي فاتت شكلهم بخير، لكن هم مش بخير خالص، ناس بتكافح علشان تكمل يومها، ناس على حافة اكتئاب، ناس بتعاني ماديًا، ناس بتعدّي بأصعب مراحل حياتها بصمت، إحنا عايشين في وقت صعب على ناس كتير، فخلّينا ناخد دقيقة زيادة، نسأل الناس اللي حوالينا بجد، وهرجع أكرر تاني، خصوصًا لو عارف إن عندهم مريض، أو حد لسه متوفي بعد رحلة مرض، او حد فقد وظيفته، اسألهم وكن حاضر لو احتاجوك، ده بيعمل فرق كبير جدًا، و ممكن تلاقي نفسك بتنقذ حد حرفيا.”
