لؤي الخطيب: الغزو الأمريكي للشرق الأوسط كارثة.. وتداعياته ستهدد المنطقة
علق الكاتب والمحلل السياسي لؤي الخطيب على التطورات الأخيرة في الشرق الأوسط، محذرا من تبعات الغزو البري الأمريكي المحتمل وتداعياته على الأمن والاستقرار الإقليمي.
وقال لؤي الخطيب في منشور له على منصة إكس: «تقارير أمريكية كتير بتتكلم عن الغزو البري كخطة بيتم العمل عليها فعليا، و وول ستريت جورنال بتتكلم عن دراسة البنتاجون لإرسال 10 آلاف جندي إضافي للشرق الأوسط، مع ملاحظة إن لحد اللحظة دي مفيش أي انتشار بري أصلا!»
أمريكا تحاول غرز الشرق الأوسط في الحروب
وأضاف لؤي الخطيب: «دي أخبار ترجمتها الوحيدة إن الأمريكان بيغرزوا بكل قوتهم في وحل الشرق الأوسط من جديد، والتاريخ بيقول إن كل خسايرهم بتبقى كوم، والمصايب اللي بتحل على دماغ سكان المنطقة الجميلة دي كوم تاني خالص، كفاية نقول إن داعش هو الابن الشرعي لغرزة العراق».
تابع: «الغرزة الجديدة دي معناها إن الحكاية مطولة، وغالبا مش هتقف عند الـ١٠ آلاف، وده هتكون له تداعيات خطيرة على أمن واستقرار المنطقة، وعلى الخطط التنموية في أغلب دولها، أو حتى على مشروع زي طريق الحرير الصيني، في أول ٣ أسابيع، لبنان والعراق اتسحبوا للحرب من غير ما الدولة تعلن إنها داخلة الحرب، لكن من خلال ميليشيات على أرضهم، ده غير دول الخليج اللي بتتهاجم يوميا من غير ما يكون ليها علاقة بأي حاجة، ومع تطور الأمور ممكن الحوثيين يدخلوا، وافتح سيناريوهات زي ما تحب، ولكن كلها سيناريوهات كارثية اقتصاديًا».
تداعيات أمنية خطيرة
وتابع: «الآثار والتداعيات ممكن تقعد لسنين، تحديدا مع تضرر كبير للدولة الإيرانية يهدد وجودها، وده هتكون له تداعيات أمنية خطيرة، خصوصًا مع احتمالية نشوب صراعات طائفية أو عرقية داخل/حول إيران».
واختتم بقوله «المشاهد البائسة دي حقيقي تخلينا نحمد ربنا ألف مرة على الشغل اللي اتعمل في البلد طول السنين اللي فاتت، بكل ضغطه وتعبه، لكن تخيل كده وسط المدعكة دي، هتعرف تعمل أكتر من ٢٠ مدينة جديدة؟ هتعرف تطور البنية التحتية والمرافق؟ هتعرف تحدث الجيش؟ طيب هو حد فايق لك علشان يديك تمويلات ميسرة تعمل بيها كل ده؟ بلاش، حد هيسمح لك أصلا؟ ربنا يعديها على خير».
