كريم سرور: "مستوى الكتابة حقيقى كان كارثى السنادى"
خرج السيناريست كريم سرور عن صمته ليعلق على مستوى الكتابة في دراما رمضان 2026، وذلك من خلال منشور له عبر حسابه الرسمي على مقوع التواصل الإجتماعي فيسبوك.
حل أزمة التمثيل في مصر
حيث قال كريم سرور: “مشكلة التمثيل اتحلت الحمدلله ، قرب الناس من الصناعة حتى لو بشكل غير احترافى على التيك توك وصناعة الفيديوهات القصيرة والريلز خلت الناس تفهم وتحس بشكل أعلى وبقوا ينتقوا الموهوب بسهولة ويبروزه للجمهور كله وللصناع ، وخلت كمان مواهب كتير تستحق تاخد فرصتها فى وقت قياسى وتتصعد بسرعة كمان ، والسنين الجاية الموضوع هيبقى اعلى بكتير”.
أزمة الإخراج أصبحت في المتوسط
وعن الإخراج قال كريم سرور: “مشكلة الإخراج مسألة معقدة شوية ما بين مخرجين شاطرين مش عارفين ينفذوا اللى فى دماغهم بسبب فقر الإنتاج ( ومقصدش مادياً ) وبين مخرجين اصلاً ضعاف أوى وشغالين لأسباب إنتاجية وشللية برضه ، وفيه مخرجين تلاتة هما اللى عملوا شغلهم بإحترافية كبيرة ودقة بسبب خبرتهم أو موهبتهم فى الأساس ، وقبل كل ده إحترامهم للجمهور بجد وللفن ولنفسهم ، لكن المستوى فى المتوسط وأتمنى فريق الجامدين يرجعوا الموسم الجى تانى عشان فرق السرعات والقدرات تبان بسرعة بين الموسمين”.
أزمة السيناريو ليس لها حل
واختتم كريم سرور حديثه عن السيناريوهات، حيث قال: “لكن موضوع السيناريو ده بقى ملوش حل ومقربناش حتى من الحل ، عملين او تلاتة بالكتير اللى ممكن يكون فيهم قصة وسيناريو وحوار يليقوا بمستوى سنة أولى أو سنة تانية إحتراف وبقية الموسم كله فى مستوى فقير جداً على المستوى الإحترافى أولاً وثانياً على المستوى الإبداعى .. أتمنى القائمين على الصناعة ياخدوا بالهم إن مستوى الكتابة حقيقى كان كارثى السنادى .. وكل سنة وإنتم طيبين وأشوفكم على خير بعد رمضان.”
كريم سرور في مسلسل إعلام وراثة
في سياق آخر، قد كشف الفنان كريم سرور، في تصريحات خاصة لـ "نيوز رووم"، أنه يجسد شخصية طبيب نفسي يدعى "خالد"، داخل أحداث مسلسل "إعلام وراثة"، بجانب كونه مؤلف العمل، وأضاف كريم سرور، أن مسلسل "إعلام وراثة"، يناقش قضية الميراث ولكن طريقة المعالجة مختلفة تمامًا عن الأعمال التي تناولت ذات الموضوع في الأعمال السابقة.
