«45 سنة شقى راحت في دقائق».. حيلة أمام ماكينة ATM تسلب مسنا 210 آلاف جنيه
تداول عدد من مستخدمي موقع فيس بوك منشورًا يتضمن استغاثة عاجلة من أسرة أحد كبار السن، بعد تعرضه لواقعة نصب وسرقة أموال معاشه في منطقة الكوبري الخشب ببولاق الدكرور.
وبحسب ما جاء في المنشور، فإن الرجل المسن كان يقوم بسحب معاشه من ماكينة ATM عندما استوقفته سيدة مسنة وأخبرته أن حسابه ما زال مفتوحًا على الماكينة. وبسبب كبر سنه وعدم إلمامه بالتكنولوجيا، عاد إلى الماكينة مرة أخرى، حيث كانت تقف فتاة ادعت مساعدته في إغلاق الحساب.
وقالت السيدة في الرواية المتداولة: «حمايا كان بيقبض المعاش من ماكينة ATM في منطقة الكوبري الخشب – بولاق الدكرور. لقى سيدة كبيرة بتنادي عليه وتقول له: “يا حاج حسابك لسه مفتوح».
أضافت: «وبما إنه راجل كبير في السن ومالوش في التكنولوجيا، وكمان مريض قلب وسكر وكان صايم وتعبان أصلًا، رجع للماكينة تاني».
تابعت: «ولما رجع، كانت بنت السيدة واقفة على الماكينة وقالت له يعمل بعض الخطوات على أساس إنها بتساعده يقفل الحساب. طبعًا هي ما كانتش بتساعده، لكنها كانت بتحاول تعرف الرقم السري للفيزا».
أوضحت: «وبعد ما عرفت الباسورد، السيدة الكبيرة ندهت عليه مرة تانية علشان تشتت انتباهه، وفي اللحظة دي البنت بدّلت الفيزا بفيزا معاها، وبكده بقت الفيزا معاهم والباسورد كمان».
واستكملت : «هو رجع البيت بعد كده، وكان الكلام ده وقت صلاة العصر، ونام وبعد المغرب مسك التليفون، فلقى إن 210 ألف جنيه اتسحبوا من حسابه، لأن الفيزا كان فيها مبلغ مكافأة نهاية الخدمة بعد تعب وشقى أكثر من 45 سنة».
وتابعت: «وللأسف ده حصل في الظروف الصعبة اللي إحنا فيها دلوقتي، واستغلوا راجل كبير في السن، وربنا وحده اللي عالم بحاله دلوقتي وللعلم، الـ 210 ألف جنيه اشترت بيهم دهب من محل ذهب في شارع العشرين – فيصل بحوالي 195 ألف جنيه، واتحاسبت على 200 ألف وأخدت الباقي. وده كلام صاحب محل الدهب».
أوضحت: «وكمان سحبت من ATM مبلغ 5 آلاف جنيه على دفعات، أماكن السحب كانت من شارع العشرين – فيصل، إحنا وقفنا الفيزا، لكن عرفنا إنها حاولت تسحب تاني بالليل من ATM في منطقة بهتيم – شبرا».
اختتمت: «نرجو من الجميع المساعدة علشان نوصل للناس دي، لأن حرام تعب وشقى 45 سنة يروح في غمضة عين، حسبي الله ونعم الوكيل، اللي يعرفهم يتواصل معايا، وليه مكافأة مالية».
