قطايف| سامح حسين: لا تكتفي بمجرد العمل بل استمر حتى تصل
أوضح الفنان سامح حسين أن الله سبحانه وتعالى يسّر لكل إنسان طريقه نحو المهمة التي خُلق من أجلها، ويسّر له سبل نجاته، ثم حبّبه في عمل خير معين وجعله سهلاً وميسوراً على قلبه، فيؤديه بحب ودون تكلف أو عناء.
لا تكتفي بمجرد العمل بل استمر حتى تصل
وأضاف حسين خلال حلقة اليوم من برنامج "قطايق” أن الحكمة من ذلك ليس أن تكتفي بهذا العمل، بل الحكمة أنك تعتبر العمل حبل تتعلق فيه لحد ما توصل لسفينة الطاعة وتركب مع الناس اللي ركبوا.
تابع: اعتبر العمل اللي بتعمله خط مفتوح بينك وبين ربنا وحافز يخليك تشتغل على علاقتك وتخليها أحسن، لكن إياك تستهين بالباب ده، إياك تستصغر فعل الخير اللي ربنا حببك فيه وتقول: يعني هو هيعمل إيه قدام السيئات اللي عمال أرتكبها؟ لأن ده يا صديقي شغل الشيطان معاك، هو عايز يلغي لك باب الطوارئ بتاعك،
وواصل حسين: الشيطان عايزك تقطع آخر خيط بينك وبين ربنا، الخيط اللي هو سبحانه وتعالى أصلاً مده عشانك علشان بيحبك ومش عايزك تضيع، أو زي ما قال الشاعر: إذا لم يكن عون من الله للفتى، فأول ما يجني عليه اجتهاده، وإن كان عون الله للعبد، أصلاً تأتي له من كل شيء مداده.
وفي نفس السياق، قال الفنان سامح حسين، إنه من الفطنة أن كل إنسان فينا يدرك أنه مجرد أداة في يد القدرة الإلهية، وعلى مسرح القدر لا خروج عن النص، متابعا: هذا جعلني أبحث في القرآن الكريم عن آيات تحمل هذا المعنى، «لقيت آيات كثيرة قوي، لكن من وسطهم في آية خطفت انتباهي، كنت أعدي عليها طول عمري كده من غير ما آخذ بالي من الحكمة العظيمة اللي فيها».
ونيسرك لليسرى
وأضاف حسين: الآية دي ربنا سبحانه وتعالى بيقول فيها: "ونيسرك لليسرى"، «يعني هنسهل طريقك للخير»، مواصلا: «يبقى المطلوب إنك تسلك الطريق».
وتابع حسين، خلال حلقة اليوم من برنامج “قطايف”: عندي قناعة شخصية مبنية على تجارب كثيرة وعلى تأملات أكثر أن كل واحد فينا ربنا سبحانه وتعالى خلق له باب طوارئ خاص بيه يقدر يهرب منه ويفلت من مصير مظلم، وربنا طول الوقت ربنا بيشاور لك على الباب ده علشان تكتشفه.
