قصة عامل دليفري في رمضان تشعل الجدل على مواقع التواصل
تداول رواد منصة إكس خلال الساعات الماضية منشورا أثار حالة واسعة من الجدل والغضب بين المستخدمين، بعدما روى أحد الحسابات قصة قال إنها وقعت مع عامل توصيل طلبات «دليفري» خلال شهر شهر رمضان، متهمًا أحد الأشخاص بالاستيلاء على طلب طعام ورفض دفع ثمنه.
وجاء المنشور كالتالي: «الأخ اللى فى الفيديو دا طلب أوردر من المطعم والشاب المسكين اللى بيشتغل دليفرى وصلهوله لغاية المكان
فتح باب الشقه وأخد الأوردر ودخل تانى وقفل الباب وراه».
أضاف المنشور: «الشاب بتاع الدليفرى فضل واقف قدام باب الشقه مستنى الراجل يطلع يديله حساب الأوردر لكن الراجل مطلعش تانى، الولد خبط على باب الشقه فالراجل طلع وهو علامات الاكل على بقه وبيقول للعامل أيوه انت مين؟، فالعامل قاله انا الدليفرى اللى سلمتك الأوردر حالا ومستنى آخد الحساب فالراجل قاله أوردر إيه وحساب إيه ياإبنى هو انت مجنون».
إخبط راسك فى الحيط
تابع المنشور: «الشاب المسكين قاله لا أنا مش مجنون انا جبتلك أوردر الأكل وانت أخدته وواضح إنك بتاكل فيه أهه وعايز الحساب، الراجل اللى ماعندوش ضمير ولا حتى عامل حساب لشهر رمضان قال للولد طب إخبط راسك فى الحيط علشان دى ساعة فطار وانا مش عايز اتهور عليك.. ودخل شقته وقفل الباب فى وش الشاب الدليفرى».
أوضح: «الشاب نزل تحت العماره وجاب 2 شباب كانوا واقفين وشافوه وهو داخل بالأوردر ونزل من غيره.. وصورهم بالفيديو وشهدهم على اللى حصل وبعد كدا طلع للراجل وقاله انا بصورك فيديو فالراجل قاله صور براحتك يا روح أمك وانا مأخدتش منك حاجه وأعلى ما فى خيلك إركبه.. هو انت جاى تتبلى عليا؟».
استكمل: «الولد قاله طب هات الطلب لو انت مش عايز تدفع علشان أرجعه وحرام تغرمنى الفلوس دى كلها فالراجل قفل الباب فى وشه وقاله غور ياض من هنا وروح إعمل اللى انت عايز تعمله».
وأثار المنشور تفاعلا واسعا بين المستخدمين، حيث عبّر كثيرون عن تعاطفهم مع عامل التوصيل، معتبرين أن مثل هذه التصرفات تمثل استغلالًا لظروف العمال، خاصة خلال شهر رمضان.
