صلاح دياب يكشف أسرار بداياته: من جمع زجاجات الكوكاكولا إلى مليارات بيكو
روى المهندس صلاح دياب، رئيس مجلس إدارة مجموعة شركات بيكو، ذكريات طفولته المليئة بالاجتهاد والابتكار، موضحا كيف بدأت مسيرته في عالم الأعمال منذ أيام المدرسة.
وخلال لقاءه مع الإعلامية لميس الحديدي في برنامج «رحلة المليار» على قناة «قناة النهار»، قال دياب: «أنا كنت في المدرسة الإنجليزي، وكانت مصاريف المدرسة وقتها 30 جنيه في الترم، ولما كنا نحاول نوفر المبلغ ده، كانت حكاية طويلة وعريضة».
التفكير بطرق مبتكرة
وأضاف صلاح دياب أن حرمانه من «الدلع» دفعه إلى التفكير بطرق مبتكرة للربح: «كنا بنروح الكانتين نشتري زجاجة كوكاكولا أو أورانجو، اللي كانت بتكلف قرشين، وندفع 3 ساغ للتأمين، والطلبة مش فارق معاهم أوي، فكانوا يشربوا ويرموا الزجاجة، فكنت بجمع الزجاجات وببيعهم».
وأشار صلاح دياب إلى أن هذه التجربة الصغيرة علمته قيمة الادخار والمبادرة، ووضعت الأساس لرحلته الطويلة في عالم الأعمال، مؤكدا أن روح الابتكار والاجتهاد تبدأ من أبسط الأشياء، حتى لو كانت جمع الزجاجات من الكانتين في المدرسة.
وفي سياق أخر، روي المهندس صلاح دياب، واقعة طريفة جمعتة بالنجمة يسرا، مشيرا إلى أنه كان يحبها للغاية ويتمنى رؤيتها، لكنه لم يكن يمتلك سبيل لهذا.
وأوضح دياب، خلال حضوره إحدى الندوات، أنه تقابل معها بالصدفة على متن طائرة كانت متجه لفرنسا، مضيفا: «أنا كنت معجب جدا بيسرا ومازالت، بس معرفش أوصلها إزاي، وبعدين في يوم بالصدفة كنت رايح باريس وقابلتها على الطيارة، وقتها قولت ده ربنا وقعها في طريقي، وطلبت منها نتعشى مع بعض وهي وافقت».
وتابع صلاح دياب: «قولت أنا هختار مطعم شيك وفاخر علشان تنبهر، لكن هي اختارت المطعم وأنا قولت تمام، ولما وصلت المطعم لقيتها جايبة يوسف شاهين وكل فريق عمل اللي كان جاي يصور معاها في باريس 11 نفر».
وواصل صلاح دياب: «قولت يخرب عقلك ايه العمله السوده دي، ليه أنا اتخيل إن في حاجه كويسة هتحصل وتنتهي بهذا الشكل، أاتاري إن مفيد فوزي كان قاعد معايا وأنا بتكلم عن يسرا ووقتها مراتي اعترضت ولما قولتلها انت مش واثقة فيا، قالتلي أنا واثقة في يسرا».
واختتم قائلا: «طلع إن مفيد فوزي نقل الكلام ده ليسرا وأصلا يسرا كانت مع مراتي في المدرسة، راحت يسرا عملت فيا الموقف ده».
