صابرين جابر تحسم الجدل لـ نيوز رووم: الدعاء للي أذاني.. قوة ولا ضعف؟
كشف خبيرة العلاقات الاسرية الشهيرة صابرين جابر في تصريحات خاصة لـ موقع “نيوز رووم”، الدعاء للي أذاني.. قوة ولا ضعف؟ خاصة وإحنا في رمضان الشهر اللي القلوب فيه بتهدي والدعاء بيبقى أقرب.
وقالت صابرين جابر: في رمضان بنحاول نبقى أحسن نقرب من ربنا نسامح نهدى بس فجأة نلاقي وجع قديم بيرجع (اسم.. ذكرى.. موقف..) وكل حاجة كنا فاكرين إنها انتهت ترجع كأنها لسه حصلت امبارح.
وساعتها السؤال بييجي لوحده:
أدعي للي أذاني؟ ولا أدعي عليه؟ ولا أتجاهل؟
هل لما أدعي له أبقى قوية؟
ولا أبقى بضعف وببرر له اللي عمله؟
الحقيقة إن رمضان بيحطنا قدام نفسنا بيخلينا نشوف قلوبنا بوضوح:
إحنا لسه موجوعين؟
ولا بدأنا نخف؟
وبيخلينا نسأل:
إحنا عايزين نرتاح…
ولا عايزين نثبت إننا صح؟
لأن في فرق كبير بين إنك تنتصر وبين إنك تهدى.
خلينا نبقى صريحين مش كل حد أذانا يستاهل ندعيله بس إحنا بندعي مش عشانه عشان نفسنا.
الدعاء مش معناه إنك سامحتي ولا إنك نسيتي ولا إنك مستعدة ترجعيه حياتك.
الدعاء أحيانًا بيبقى محاولة إنك تطلعي من الوجع مش ترجعي له.
لما تقولي يارب ريح قلبي أو يارب خد حقي.
إنتي كده بتختاري نفسك مش بتختاريه.
ليه بنرفض ندعي للي أذانا؟
عشان إحنا موجوعين وعشان جوانا إحساس إن الدعاء ده تنازل كأنك لما تدعي يبقى كده سامحتي وكأنك لو سامحتي تبقى ضعيفة.
بس الحقيقة إن الدعاء مش حكم الدعاء علاج.
انتي ممكن تكوني موجوعة ولسه مش مسامحة وبرضه تدعي عشان تخفي مش عشان تنسي.
أهم فرق لازم تفهميه:
في فرق كبير جدًا بين: تدعي له تسامحيه ترجعيه حياتك.
التلاتة مش لازم يمشوا مع بعض.
ممكن تدعي له وقلبك يهدى
ممكن تسامحيه وترتاحي
بس ما ترجعيش العلاقة تاني خالص.
وده مش تناقض ده نضج.
طيب نعمل إيه؟
1. ما تجبريش نفسك
لو مش قادرة تدعي له ما تضغطيش على نفسك.
ابدئي بنفسك:
“يا رب اشفي قلبي”
“يا رب طمني”
2. خلي نفسك أولاً
قبل ما تفكري فيه اسألي نفسك:
“أنا محتاجة إيه؟”
راحة؟
أمان؟
قوة؟
ابدئي بنفسك مش بيه.
3. ادعي بوعي مش بعاطفة
لو هتدعي له خلي الدعاء متوازن:
“يا رب اهديه أو اكفيني شره”
“يا رب خد حقي منه”
ده دعاء مش ضعف ده دعاء حد فاهم نفسه.
4. اقفلي الباب كويس
الدعاء مش دعوة رجوع.
لو العلاقة كانت مؤذية:
• ما تفتحيش كلام
• ما ترديش بدافع الحنين
• ما ترجعيش لنفس الدائرة
القلب ممكن يلين بس القرار لازم يبقى بعقل.
5. سامحي لما تبقي جاهزة
التسامح مش إجبار ولا لازم يحصل بسرعة.
سامحي لما:
• قلبك يهدى
• وجعك يقل
• تبقي قادرة فعلاً
مش عشان الناس قالت لك.
6. ما تكرريش نفس الوجع
أكبر غلط بنعمله:
نسامح ونرجع ونتوجع تاني.
القوة مش في التسامح بس القوة إنك ماتعيشيش نفس الألم مرتين
مش كل اللي بتدعيله ينفع يرجع حياتك.
ومش كل اللي سامحتيه يستاهل فرصة تانية.
في ناس مكانها الطبيعي يبقى برا حياتك حتى لو جوا دعائك
في النهايه ..
الدعاء للي أذاك مش ضعف.
الضعف الحقيقي إنك تفضلي مرتبطه بوجعه
والقوة مش إنك تكرهي القوة إنك تختاري سلامك النفسي .
وفي رمضان…
مش مطلوب منك تبقي مثالية بس مطلوب منك تحاولي تبقي أهدى.
لأن في الآخر…
مش كل اللي خرج من حياتك خسارة ممكن يكون نجاة.
وفي ناس…
مكانها في الدعاء بس… مش في حياتك.
