أحمد مرتضى يهاجم ممدوح عباس: "دخلنا النادي لقينا فيه 700 جنيه"
هاجم أحمد مرتضى منصور، عضو مجلس إدارة نادي الزمالك الأسبق، رئيس النادي السابق ممدوح عباس، مؤكدًا أن فترة رئاسته شهدت تحديات وأزمات كبيرة أثرت على استقرار النادي.
وقال منصور، خلال ظهوره في "بودكاست جول كاست"، إن ممدوح عباس أنفق مبالغ طائلة فقط لإزاحة والده مرتضى منصور من المشهد، مضيفًا: "لو كان حط الفلوس دي في النادي، كنت أنا شخصيًا سبت له النادي".
مشاكل نادي الزمالك
وأضاف: "عباس كان بيأجر قنوات إعلامية، وكان عنده جماهير بتشتغل لصالحه، حتى المحامي بتاعه بقى مليونير، رفع على النادي 200 قضية، وعلى مرتضى 200 تانية"، مشيرًا إلى أن تلك القضايا كانت سببًا في ضغوط رهيبة على النادي.
وتابع: "ممدوح عباس مسك النادي في 2007 وماحققش بطولة واحدة، وأنا سبت الزمالك في 2005 وكان الأهلي والزمالك قريبين من بعض في عدد البطولات الإفريقية. لما رجعت لقيت الأهلي سبق الزمالك بفارق كبير، لأن الإدارة وقتها مكانتش ناجحة".
وأشار أحمد مرتضى إلى أن الإدارة ليست بالأموال فقط، بل تحتاج إلى خبرة ورؤية واضحة، مضيفًا: "الكرة علم، مش فلوس وبس، لازم تعرف المراكز اللي محتاجها الفريق وتشتغل عليها علميًا مش عشوائيًا".
أزمات في الزمالك
كما كشف أن النادي تعرض للحجز عليه أكثر من 10 مرات خلال فترة عضويته بالمجلس، قائلًا: "ممدوح عباس كان بيضغط على النادي، بيقول إنه سلف الزمالك، لكن ماعملش الإجراءات القانونية اللي تضمن له استرداد فلوسه، ومع ذلك خد أحكام قضائية لصالحه".
وتابع: "أنا خايف يكون بيقرض النادي دلوقتي وياخد شيكات، وساعتها اللي هييجي بعد كده هيلاقي نفسه متورط في ديون وشيكات، لازم الناس تسأل: هو بيدفع حبًا في الزمالك ولا عشان يتحكم فيه؟".
وانتقد الوضع الحالي في النادي، قائلاً: "دلوقتي مافيش شفافية، لما تركي آل الشيخ دفع فلوس للزمالك، مرتضى منصور طلع أعلن الرقم، لكن النهارده مافيش أي وضوح، للأسف اللي جاي للزمالك هيبقى أسوأ، النادي ماشي من غير خطة".
واختتم تصريحاته بكشف الوضع المالي الكارثي الذي وجده عند توليه المسؤولية في 2013: "دخلنا النادي لقينا فيه 700 جنيه بس! وكنا بندي دفعة للاعبين زي عمر جابر وشيكابالا 10 آلاف جنيه، واللاعبين كانوا بيطلبوا 500 جنيه عشان يحطوا بنزين".
