عمرو أديب يشيد بجلسة مجلس النواب اليوم.. ويؤكد: «البرلمان مش للتمرير»
أشاد الإعلامي عمرو أديب بما حدث اليوم داخل ساحات مجلس النواب بشأن الخلافات على الموازنة العامة للدولة؛ قائلا: «وجود مجلس النواب مش للتمرير، وجود المجلس للمحاسبة، ما كل الفلوس سواء كان تعليم مجاني أو غيره ماهي فلوس الشعب وضرائب الشعب».
فكرة الاعتداء على الأطباء
كما علق الإعلامي عمرو أديب على أزمة هجرة الأطباء التي أثارها أمس؛ قائلا: «هل ممكن بأي حال إن أقول شئ عظيم الاعتداء على الأطباء في المستشفيات؟!، لأ، وعلى فكرة الاعتداء على الأطباء موجود في كل حته في العالم، وانا مش ببرر العنف، والعنف ضد الأطباء مرفوض رفضا تاما، لكن لازم نشوف حل لموضوع الأطباء، هو عيب لما أقولك البلد صرفت عليك؟، طب ما صرفت عليا أنا كمان، أنا تلت أربع دفعتي وانا متخرج من 30 سنه قاعدين في البيت لدلوقتي».
وقال الإعلامي عمرو أديب خلال تقديم برنامج “الحكاية” والمذاع عبر قناة “ام بي سي مصر”: «عندي ثقة منقطعة في الطبيب المصري، أنت عارف فيه كام واحد خريج كلية قاعد في البيت، إحنا عاوزينك يابني، إحنا محتاجينك، انتوا عاوزين مذيع ميت؟!، إحنا مؤثرين جدا، وقضية الأطباء موجوده قدام الدنيا كلها».
كما انفعل الإعلامي عمرو أديب على ردّ فعل الأطباء بشأن الهجرة التي أثارها أمس؛ قائلا: «يا عم سافروا كلكم سيبوا البلد وسيبوا المستشفيات، أنا ازعل في أي، بس أنا شايف إن البلد لازم تتصرف، هو النهاردة حضرتك كطبيب أو طبيبة اخدت الشنطة وسافرت حد هيقولك حاجة، أعمل فلوس وانبسط ياخي بس عامل على الناس اللى هنا»
وقال الإعلامي عمرو أديب: «عندنا مأساة إن ناس بتعلق وتعمل مواقف على عنوان أو فيديو من غير ما تشوف الفيديو، وناديت في تويتة إن الدولة تحقق مطالب الأطباء وما يبقاش فيه قلق»
وأضاف الإعلامي عمرو أديب خلال تقديم برنامج «الحكاية»: «سألت نفسي سؤال لو كنت قولت للدولة خلي الناس تسافر، خليهم ياكلوا عيش، البلد فيها مشكلة في الأطباء والتمريض، وكل سنة بيسافر 7 آلاف طبيب».
واستكمل: «لقيت أطباء زعلانين أنت عارف إحنا بناخد كام؛ ما تقارنش أي حد بالدكتور، محاسب مزارع أي غلطة منه كارثة، تخيل اخدت ابنك أو بنتك ومافيش دكتور، مين يدفع تمن دا، ابوك أو أمك أو البنت يقعدوا العمر كله كده».
