زي طبق الكشري .. أحمد مالك وهدى المفتي يكشفان تفاصيل مسلسلهما سوا سوا |فيديو
كشف الفنان أحمد مالك والفنانة هدى المفتي، تفاصيل مسلسلهما الجديد سوا سوا، والمقرر عرضه في موسم دراما رمضان المقبل 2026.
تفاصيل دور أحمد مالك في مسلسل سوا سوا
وأكد أحمد مالك أنه يقدم دور شعبي خلال أحداث المسلسل، ولكن يختلف عن مسلسله السابق ولاد الشمس، حيث قال خلال لقائه مع برنامج ET بالعربي : “أنا ممثل والممثل يقدر يقدم أي شخصية .. وأنا مش عايز أحصر نفسي في أدوار معينة .. وبحب أقدم جميع الشخصيات .. والتحدي الكبير بالنسبة لي إننا بنحس إن الدراما الشعبية كلها نفس الطريقة .. ولكنها قماشتها واسعة جدًا وشخصياتها كتيرة أوي ومختلفة”.
زي طبق الكشري
أما عن وصفه لطبيعة أحداث مسلسل سوا سوا، رد مالك : “مسلسل سوا سوا زي طبق الكشري .. لأنه فيه تنوع بين التراجيديا والكوميديا”.
شخصية هدى المفتي في مسلسل سوا سوا
وأشارت هدى المفتي، خلال لقائها مع ET بالعربي كذلك، أنها تقدم شخصية فتاة شعبية مختلفة عن التي قدمها في مسلسلها الرمضاني الماضي 80 باكو، قائلة : “أنا كنت بعمل دور البنت الشعبية بوسي السنة اللي فاتت في مسلسل 80 باكو .. وكنت حريصة السنة دي في مسلسل سوا سوا إن شخصية أحلام تبقى مختلفة رغم إنها شعبية برضو .. وبوسي علاقتها بأهلها مختلفة عن أحلام”.
وواصلت : “كنت بقرأ كلام أحلام بطريقة بوسي أول أما جالي الورق .. ولكن أدركت إنها شخصية مختلفة وغيرت فيها .. ووافقت بعدها على الدور”.
كواليس تعاون هدى المفتي مع أحمد مالك
وأضافت هدى المفتي : “لما جالي الدور قلقت وفكرت هل صح إني أعمله ولا لأ ؟ .. وأحمد مالك ممثل شاطر أوي .. وساعات لما بيتكلم بفتكر إنه بيتكلم عادي ولكن يطلع بيقول الكلام اللي في السيناريو .. وهو ممثل تصدقيه أوي ودي حاجة تخوف .. وتخليكي تسألي انتي هتعرفي توصلي للمرحلة اللي هوا فيها في الشغل ولا لأ .. لأنك ممكن تظبطي الدنيا أو تبوظيها خالص”.
أبطال مسلسل سوا سوا
يُذكر أن مسلسل سوا سوا، يدور في إطار اجتماعي إنساني، يعيش خلاله مالك وهدى قصة حب، والعمل مكون من 15 حلقة، ويشاركهما في بطولته، نهى عابدين، أحمد عبدالحميد، شريف دسوقي، خالد كمال، حسني شتا، عبدالعزيز مخيون، خالد كمال، محمود السراج، وغيرهم من النجوم، والمسلسل تأليف مهاب طارق، إخراج عصام عبدالحميد، وإنتاج صباح إخوان للمنتج صادق الصباح والمنتج أنور الصباح.
