عمرو أديب لرئيس الوزراء: المواطن لا يشعر بتحسن اقتصادي والأسعار ما زالت مرتفعة

قال الإعلامي عمرو أديب إن الأرقام الرسمية تشير منذ شهور إلى تحسن اقتصادي وتراجع معدلات التضخم، موضحا أن نسبة التضخم في عام 2023 كانت ضعف المعدلات الحالية، وأن الدولة تستهدف الوصول إلى رقم أحادي عند 7%.

المواطن يشعر بالغلاء وعدم استقرار الاسعار

وأضاف أديب، خلال حلقة اليوم من برنامج «الحكاية» المذاع عبر شاشة أم بي سي مصر: «الدولة بتقول إن السلع متوفرة، وإنها بتعمل اللي عليها وبتراقب الأسواق، لكن لما نسأل المواطن يقولك الدنيا غالية، ومش حاسس بأي انخفاض في الأسعار».

وتابع: «فاتورة الكهرباء زادت وفاتورة الميه زادت وكيلو الفراخ غلي ومصاريف المدارس زادت وكل حاجة تقريبا زادت مش قلت، وحتى لما المواطن يفك شهادات الادخار يلاقي العائد أقل، فماذا يفعل المواطن في هذه الحالة؟».

وأشار عمرو أديب إلى أن الدروس الخصوصية أصبحت عبئا إضافيا على الأسر، قائلا: «الدرس الخصوصي النهارده بقى بكام؟ الناس لسه تعبانة ومش قادرة».

رسالة هامة رئيس مجلس الوزراء 

ووجه رسالة إلى الدكتور مصطفى مدبولي، رئيس مجلس الوزراء، قائلا: «حضرتك قلت إن السنة دي هتبقى أفضل، لكن لحد دلوقتي الناس لا تشعر بأي انخفاض في الأسعار، ولسه الغلاء مسيطر».

كما وجه عمرو أديب رسالة للتجار، قائلا: «يا جماعة ارحموا الناس، أنتم كده بتكسروا السوق وإحنا داخلين على موسم شراء مستلزمات رمضان، ولو فضلتوا تضغطوا على الناس بالطريقة دي، الناس هتقلل استهلاكها أكتر، وده مش في مصلحة حد».

وأضاف: «الأرقام بتقول إن استهلاك الناس قل بسبب ضعف القدرة الشرائية، وده شيء لا يفرح أحد. الفراخ ب100 و120 جنيه، والسجائر المارلبورو 100 جنيه، والسكر زاد، ولسه ما اتكلمناش عن البيض واللحمة».

وتابع: «سمعت تعليق بيقول إن البيض غلي وبقى بيصغر، تعليق يوجع القلب، لأن ده بيعكس حجم المعاناة».

وأكد أديب أن استمرار الغلاء قد يؤدي إلى ركود في السوق، قائلا: «التاجر اللي هيغلي زيادة هيلاقي نفسه قاعد بالبضاعة مش عارف يبيعها، وهتبوظ، وإحنا داخلين على أيام مفترجة».

واختتم حديثه قائلا: «في أرقام بتقول إن ديون المواطن زادت لأنه بيستدين علشان يعيش، وده وضع خطر، لازم يكون في رشد، لأن الضغط ده في يوم من الأيام ممكن ينفجر».