شاهد عيان يكشف تفاصيل إنسانية مؤلمة في واقعة مقتل فتاة الإسكندرية
كشف أحد شهود العيان تفاصيل جديدة ومؤثرة في واقعة مقتل فتاة الإسكندرية، مؤكدًا أنه شاهد على مجريات الأحداث منذ بدايتها، ومعلنًا استعداده الكامل للمساءلة القانونية عن كل ما يرويه، في شهادة تحمل أبعادًا إنسانية واجتماعية خطيرة حول حياة الضحية قبل عودتها للشارع وانتهاء قصتها بشكل مأساوي.
وقال شاهد العيان: «أنا شاهد على كل حاجة حصلت في القضية دي، ومستعد للمسألة القانونية عن كلامي».
وأضاف: «من ٤ سنين جالنا استغاثات في بنت منقبة في شوارع رمسيس عندها تعب نفسي، وست ربنا يكرمها كلمتها وقالتلها زهرة مصر هتيجي توديكي الدار علشان متناميش في الشارع».
وتابع: «نزلنا أنا وسمر ومحمد بندور على بنت منقبة ورفيعة في وسط مليون إنسان في شوارع ميدان رمسيس، فجأة لقيت بنت بنفس المواصفات دي، قولتلها انتي ضحى؟ قالت لا، وبعديها قالت آه انت تعرفني؟».
وأضاف: «قولتلها مش في ست قالتلك إن زهرة مصر هتيجي تاخدك توديكي الدار؟ ضحى قالتلي آه بس هي مش معاك، قولتلها خليكي معايا ثانية وهتجيلك».
واستكمل روايته قائلًا: «قالتلي أنا عارفة شكلها على فكرة الست ورتهالي، قولتلها ماشي هي هتيجي دلوقتي، واتصلت بسمر قولتلها تعالي عند البنك أنا لقيتها الحمد لله».
وأضاف: «سمر قالتلي بجد؟ قولتلها والله ضحى معايا، وجت واتكلمت معاها والحمد لله اقتنعت إنها تيجي معانا الدار في الشرقية».
وتابع: «وصلنا ضحى واتطمنّا عليها، وكل حاجة بقت تمام، طول الطريق واحنا رايحين مبطلناش ضحك، أقسم بالله أنا عمري ما ضحكت بالشكل ده، وصلت لمرحلة إن جسمي وجعني من كتر الضحك، عمري ما هنسى اليوم ده».
وأضاف: «ولما سمر فتحت الدار، جت ضحى علشان تعيش أجمل أيام حياتها، وحالتها النفسية والمرضية تتحسن جدًا، وكنتم بتشوفوا ده في الفيديوهات».
وأشار شاهد العيان إلى أحد أحلام الضحية قائلًا: «وطبعًا سمر خدتها عمرة لأن ده كان حلم من أحلام ضحى».
وأضاف واصفًا شخصيتها: «ضحى دايمًا كان على لسانها كلمة: زعلان مني أو زعلانة مني، كانت بتخاف حد يزعل منها».
ثم نقل شهادة مؤلمة على لسان الضحية نفسها، قائلًا: «هقولكم كلام عن لسان ضحى واتسأل عليه أمام الله: (أبويا دايمًا بيطردني من البيت، بيقولي دايمًا انتي مجنونة، أبويا بيقولي انتي هتوقفي حال إخواتك البنات، امشي من البيت انتي مش طبيعية، انتي عليكي عفريت، أنا بحب إخواتي أوي، أنا مش عارفة إخواتي ليه عايزني، أنا ماما وحشتني أوي)».
وأضاف شاهد العيان: «كل ده كلام كانت بتاخده من أبوها عن لسانها، وكان يقولها عايزة تمشي امشي».
واختتم شهادته قائلًا: «أنا مش راجل قانون، بس أبوها سبب من ضمن أسباب اللي حصلها، وهو والجاني طبعًا، وكل من تسبب إنها ترجع الشارع تاني. حسبي الله ونعم الوكيل في كل اللي كان السبب، وربنا يرحمك يا ضحى، عمرنا ما هننساكي».
