عضو مجلس إدارة الأهلى: مررنا بصعوبات ونقد متواصل ..والأهلى هو جنة جمهوره

الخميس 30/يناير/2025 - 02:39 م

أعرب الدكتور محمد الدماطى، عضو مجلس إداراة النادى الأهلى، عن سعادته البالغة بسبب حالة الرضا التى يعيشها جمهور القلعة الحمراء، خاصة بعد الاعلان عن صفقات الميركاتو الشتوى للفريق، وانضمام اللاعب المحترف محمود حسن تريزيجيه والمغربى أشرف بن شرقى.

وأوضح محمد الدماطى أن وجوده فى موقع المسئولية داخل النادى الأهلى لا يقلل من كونه "متعصب ومحب وعاشق" للكيان، مشيرًا إلى أنه تأثر نفسيًا بالسلب بسبب الهجوم والانتقاد الذى تعرض له مجلس إدارة النادى الأهلى بسبب تأخر الصفقات.

وقال الدماطى عبر حسابه الرسمى على موقع التواصل الاجتماعى فيسبوك: "الحمد لله أنا عندي من الشجاعة و الثقة اللي يخليني اقول كل اللي جوايا من غير كسوف بعيد عن اي حاجة ، و بعترف بوضوح اني كبني ادم طبيعي اهلاوي متعصب و في موقع مسئولية، بتأثر بشكل سلبي جدا من كمية النقد و الضغط المتواصل ، يمكن لمرحلة محدش يتخيلها عكس ما الناس بتبقي فاهمة، و الاحساس دة بيزيد لان حقيقي شايف الصعوبات و التحديات".

وأكد الدماطى أنه لا يشك أبدا في أسلوب إدارة الكورة في النادي الأهلى، كونه قادرا فى أى وقت على اجتياز الصعوبات والأزمات.

وتابع الدماطى قائلاً:" المهم إن كل الضغط النفسي ده اللي ببقي متخيل انه حيفضل سايب جوايا رواسب مهما حصل بينتهي بمجرد ما بشوف الجمهور فرحان، مجرد كلمة واحدة كويسة بتمسح اي حاجة قبلها، متفهم جدا ان الاهلي هو جنة جمهورة، الجنة اللي مش متخيل انه يشوف فيها حاجة غلط و لو لفترة صغيرة ، متفهم جدا ان أي صعوبات في الدنيا الأهلي بيهونها و انه مش مجرد نادي.. ده دواء لحاجات كتير اوي لينا كلنا".

آراء الجمهور

وعلق أحد المتابعين على ما قاله عضو مجلس اداراة الأهلى قائلاً:" اهو احنا كجمهور الاهلي كده هنشوفكو نايمين هنصحيكو معندناش شك انكو بتحبو النادى بس في بعض الأمور لازم تخاطب فيها جمهورك و تساؤلات كتير بالذات في ملف الكرة. بس الميركاتو لسه مخلصش و احنا لسه فرحتنا مكتملتش عايزين مدافع تاني و وينج عايزين نشوف موضوع الإصابات هل أحمال زيادة ولا تشخيص خاطىء و صربعه في نزول اللاعبين في الملعب و إعدادهم طبيا و بدنيا عايزينكو قريبين من الجمهور ".

وعلق متابع آخر قائلاً: "عاوزين نعرف كابتن محمد رمضان قاعد ليه لما منع اللاعيبة تروح تحيي الجمهور ما هي الكرة بتتلعب علشان الجمهور الموضوع مش موضوع صفقات خلي بالك اللاعيبة رجعتلها الروح في ماتش بيراميدز علشان كابتن الخطيب راحلهم في التدريب ففي حاجه غلط" .