«أيمن السويدي كان عقيما».. هاني مهنا يكشف سر رحيل الفنانة ذكرى
كشف الموسيقار الكبير هاني مهنا عن أسرار حول حياة الفنانة الراحلة ذكرى وعلاقتها بزوجها رجل الأعمال أيمن السويدي، وذلك خلال لقائه مع الإعلامية ياسمين عز في برنامج «كلام الناس» المذاع عبر فضائية «MBC مصر».
سر القطيعة وزواج أيمن السويدي
وأكد هاني مهنا أنه قاطع الفنانة ذكرى لمدة 3 أشهر بعد زواجها من أيمن السويدي، موضحا: «ذكرى من الأصوات اللي مش هتتكرر صراحة.. لو عاشت كانت هتفضل عملاقة ونجمة لآخر الدهر.. إحنا اتحرمنا منها بدري، وأنا عارف إمكانياتها، إحنا لسه مسمعناش ذكرى الحقيقية، ذكرى أقوى وأحس بكتير من اللي سمعناه».
وعن سبب الخلاف، قال هاني: «التركيبة مش صح.. أيمن الله يرحمه تركيبته معاها مش هي دي اللي تمشي مع ذكرى الفنية.. ميركبوش مع بعض، وهو مش فنان، فكنت خايف إن العلاقة تدمر، واللي خفت منه حصل للأسف».
سبب مقتل ذكرى وانتحار زوجها
وحول السبب الحقيقي وراء المشاجرة التي أدت إلى مقتل ذكرى وانتحار زوجها، أوضح هاني مهنا: «هي كانت نفسها تخلف، وهو كان عنده عقم.. هو كان عارف بس مقلهاش، وعشان كدة حصل التنافر ده، وهو مش قادر يواجهها أو يقولها، وفي نفس الوقت مجروح لأنه مش قادر يسعدها ويديها اللي هي عايزاه».
مختتما: «عرفت بعد نقاش.. حصل نقاش وعرفوا، وبعدين نقاش تاني حصل فيه الموت.. بس، ربنا يرحمهم».
بكاء شيرين عبد الوهاب
وردا على سؤال ياسمين عز حول تسببه في بكاء شيرين قديما حين نصحها بالغناء الشعبي فقط، قال هاني مهنا: «شيرين جاتلي هي وسعيد الأرتيست، فسمعتني صوتها، سمعتني يومها عيون القلب لنجاة.. عيون القلب أنا مسجلها مع نجاة، ونجاة عبارة عن صوت لؤلؤة، غلط إنك تسرحي ثانية وإنتي بتسمعيها، لازم تركزي معاها أوي عشان تعيشي المود بتاع نجاة الصغيرة».
وتابع: «عشان كدة لما سمعت شيرين، قلت لها بصي إنتي المفروض صوتك حلو أوي في الشعبي.. وأنا بالعكس، كلمة شعبي دي مش تقليل من قدرها، ده بالعكس، الصوت اللي بيقدر يغني شعبي بيوصل للناس من الطبقة البسيطة لحد الـ Top، أكتر من الصوت الفئوي مثلا.. فمش تقليل من قدرها».
