حاسة بكل اللي خايف .. رحمة أحمد توجه رسالة شكر لكل من ساندها بعد قرار اعتزالها
حرصت الفنانة المعتزلة رحمة أحمد على توجيه رسالة شكر لكل من ساندها خلال الأسابيع الماضية، سواء من جانب أصدقائها في الوسط الفني أو خارجه بعد قرار اعتزالها التمثيل .
ونشرت رحمة أحمد بوست على حسابها الخاص على موقع التواصل الاجتماعي فيس بوك وعلقت قائلة: شكرًا لكم الكلام الإيجابي والتشجيع النفسي والمعنوي، شكرًا لكل حد كتب كلمة حلوة في حقي ورد غيبتي على أي حاجة مش كويسة بتتقال عليّا، سواء من جمهور أو فنانين، خصوصًا فنانين وفنانات بيدعموني Inbox ، وكل حد بيشتكيلي من تجربته اللي خايف حتى يعبر عنها أو يتكلم، يتقطع رزقه لو اتكلم.
رحمة أحمد
وأضافت رحمة أحمد : فيه اللي انقطع رزقه حرفيًا، وكل واحدة خايفة تدعمني قدام الناس لا حد يشوف كومنت بتاعها، أنا حاسة بيكي ومقدرة ومعاكي جدًا في ده لو لسه عايزه تكملي في شغلك، بس أهم حاجة عايزة أقولها، الرزق ده بتاع ربنا مش بتاع حد، وفي فنانين كبار جدًا عارفين باللي بيحصل ومش عاجبهم كمان القرف اللي بيحصل، لأن ببساطة شغلهم بيتظلم وسط فئة تانية مالهاش علاقة بالفن لا من قريب ولا من بعيد، معتبرينه سبوبة مش أكتر.
واختتمت : تاني بقول شغلانة زي أي شغلانة في العالم، فيها الحلو وفيها الوحش، بس الوحش صوته عالي وهمجي وبيلغوش على الكويس.
وكانت أعلنت الفنانة المعتزلة رحمة أحمد عن استعدادها لبدء مشروعها الجديد في تصنيع الملابس وذلك بعد اعتزالها للفن ، وأشارت إلى احتياجها لرأي الجمهور لكي تبدأ في صناعة الملابس .
وكتبت الفنانة رحمة أحمد عبر حسابها الشخصي على موقع التواصل الاجتماعي فيس بوك : مشروعي الجديد صغير وبسيط لسه hoodies
وأضافت : لو عجبكوا قولولي أكمل فيه ولا لا ، ولو حد عنده اقتراحات يقولي .
ملحوظة: الصورة دي بال AI فلو تمام عرفوني علشان أبدا تصنيع ان شاء الله .
سبب اعتزال رحمة أحمد
وكانت كشف الممثلة الصاعدة رحمة أحمد سبب قرار اعتزالها التمثيل بعد إعلانها ذلك في منشور عبر حسابها بموقع فيسبوك أمس، حيث سردت العديد من الأسباب منها أن هناك مساومات وتنازلات تفرض عليها حتى تستطيع أن تقدم أدوارًا جيدة.
وأكدت رحمة أحمد أنها لم تتحجب مثلما ذكرت بعض الصفحات ولم تتب لأنها لم تفعل شيئا حراما وتحترم الفن، حيث كتبت: “كلام للي مهتم فقط.. أنا محدش يعرفني ومحدش مهتم بأخباري غير اللي بدأوا معايا رحلة وعارفني كويس”.
وأضافت: “أنا مش جايه اعمل تريند، أنا مقولتش اتحجبت زي ما الصفحات بتنزل، أنا قولت كفاية تمثيل ومش معنى كده اني بقول أنا توبت، توبت دي لما أكون كنت بستخدم مهنة التمثيل في حاجة حرام أو حاجة غلط والحاجات اللي اشتغلتها واختارتها أكبر دليل، لكن بالعكس أنا بحترم الفن جدا ويمكن ده سبب ابتعادي عنه لاني علشان اشتغل ويكون ليا أدوار حلوة مضطرة ادفع تمن كبير سواء مجاملات او اساءات أو تعدي عليا أو مساومات من بعض المخرجين والمنتجين وأحيانا نجوم. علشان اعمل الدور ده لازم أوافق على حاجة معينة طبعا مش كل الناس كده ودي مهنة زي أي مهنه فيها الكويس والوحش، أنا بحترم الفن جدا وبحترم الفنانين اللي بجد”.
