في الذكرى الـ15.. ثورة 25 يناير 2011 في عيون شباب جيل Z | ماذا قالوا؟

تحل اليوم الأحد الذكرى الخامسة عشر على ثورة يناير 2011، التي قادها الشباب من الشعب المصري والتي وصل عمره اليوم فوق الـ 40 عامًا، وأصبح الآن الموجود على الساحة هم جيل Z الذين لم يعودوا مجرد فئة عمرية شابة، بل أصبح القوة المحركة التي تعيد تشكيل العالم في 2026، وهنا يطرح السؤال لو كان جيل Z حاضرًا في ثورة يناير 2011 ماذا كانوا سيفعلون؟ هل كان حضور هذا الجيل سيغير مسار الثورة؟.

شباب جيل Z 

جيل Z ولد في قلب التكنولوجيا، وتشكل وعيه بين الشاشات والمنصات الرقمية، لا تحكمه الشعارات بقدر ما تحركه الأسئلة، ولا يقوده الهتاف وحده بل البحث عن المعلومة والتحقق منها، حيث اعتاد التنظيم عبر الفضاء الإلكتروني، وصناعة الرأي العام بالـ«ترند» لا بالمنصة فقط، كان سيخوض يناير بأدوات جديدة، وحسابات أكثر حذرًا، وربما بقدرة أكبر على كشف محاولات التوظيف والاختطاف.

ثورة 25 يناير في عيون شباب جيل Z 

وفي السطور التالية سوف نرصد لكم آراء عدد من شباب جيل Z في ثورة 25 يناير 2011، وماذا كانوا سفعلون ؟:

بحس بالفخر إني عاصرت ثورة 25 يناير وأنا صغيرة

بحس بالفخر إني عاصرت الفترة دي حتى لو كان عندي ٥ سنين بس، هذه أول جملة قالتها ملك حسين الطالبة الجامعية عن ثورةة 25 يناير، مؤكدة أنها من وجهة نظرها كانت صعبة فترة ومؤلمة على الشعب بسبب سوء الأحوال العامة وكمان بسبب عدد ضحايا الثورة، لكن برضو فخورة ومبسوطة لأني على طول كنت بسمع عن مقاومة الشعب المصري وبسالته قدام الاحتلال والحكام الظلمة لكن كانت أول مرة أشوفها بنفسي على الحقيقة وأكيد هحكي لولادي عن الفترة دي.

وتابعت: "بخصوص لو كنت هشارك في الثورة ساعتها ولا لأ فأنا لو كنت شابة في وقت الثورة في 2011 وكنت لا أملك أي حرية رأي أو حرية سياسية في إني أختار رئيس بلدي خصوصا إن كان بيبقى في تزويرات كتير في الانتخابات علشان الرئيس السابق محمد حسني مبارك يكسب كل فترة انتخابية باكتساح أكيد كنت هحس بالضعف والعجز اللي الشعب حسه في الوقت ده وكمان في ظل ارتفاع الأسعار وعدم وجود أي فرص عمل أو سكن أكيد كل دي أسباب هتحسسني بالعجز واليأس اللي في الآخر أدوا للغضب اللي نتج عنه الثورة، وأنا لو كنت أقدر كنت هشارك في الثورة خصوصا إنها كانت ثورة سلمية من ناحية الشعب فمكانش هيبقى فيها أي فعل غير قانوني من ناحيتي لكن بصراحة لما الأوضاع اشتدت وابتدى ضرب النار من ناحية الشرطة كنت هتراجع ومش هكمل، بس دايما هيبقى عندي اقتناع إن لو مفيش حرية سياسية وعدالة اجتماعية وتكافؤ فرص يبقى ده أكيد سبب كافي إن الشعب يثور ويطالب بتغيير الوضع الحالي لأن ده حق كل مواطن مهما كانت هويته وجنسيته".

الثورة هتفضل حدث تاريخي مهم

ومن جانبها قالت نغم الطالبة الجامعية: "ثورة 25 يناير كانت ثورة كبيرة ومهمة ثورة شارك فيها كل الفئات من رجال وسيدات وكانت ثورة مهمة من حيث قوة إرادة الشعب ومطالبته بحقوقه وعلى الرغم من صغر سني وقتها إلا إني فاكرة بعض التفاصيل المحفورة في ذاكرتي عن الثورة والأحداث ساعتها، ثورة استشهد فيها كتير من الشباب وهما بيرفضوا وضع غير مرضي بالنسبه لهم ولكن الثورة هتفضل حدث تاريخي مهم أكيد، وأنا طبعاً مع الثورة في الوقت ده جداً وفخورة بالناس اللي نزلت وشاركت فيها، أنا كنت صغيرة ساعة الثورة بس طبعاً لو كنت كبيرة ساعتها الوضع مكنش هيعجبني وكنت هبقى حاسه بعدم الرضا ولكن طبعاً كنت ممكن أحس بالضعف والتردد شويه من المشاركة بس متأكدة إني كنت هتغلب على الاحساس ده وهنزل اشارك حتى لو مفيش حاجه هتتغير كفايه إني نزلت وشاركت الشعب في الثورة".

الثورة خسرتنا أكتر من ما كسبتنا

وأضافت ملك محمد : "بصراحه أنا شايفه إن ثورة 25 يناير اه هو فعلا كانت سبب في تغيير جذري لنظام الحكم لمصر ولكن يعني خسرنا اكتر ما كسبنا يعني لو هنتكلم بدقة عن الثورة فهي منجحتش لإنه كانت المفروض لتغيبر الأوضاع الإقتصادية والاجتماعية والسياسية بس ده محصلش في الأول لإني بعد الرئيس مبارك تولي محمد مرسي والإخوان ومكنش فيه اي تغيير لأوضاع البلاد بالعكس وده خله هناك في ثورة ثاني ونيجي طبعا للفترة الي الثورة كانت قائمة فيها إنعدام امان بمعني الكلمة هروب المجرمين والمسلحين وموت الكثير من الناس صحيح بعد كده لم تولي الرئيس عبدالفتاح حصل بعد كده تغيير ولكن انا بصراحه مكنتش شايفه اني الثورة هي الحل الأحسن ولو كنت موجوده وقتها مكنتش هشارك فيها ولا كنت هبقي عاوزاها احنا احتاجنا سنين عشان نصلح الي الثورة عملتها صحيح كان فيه خراب كبير من الاول بسبب حسني مبارك لكن في بداية الثورة لم حصلت هو وعد بأني كل حاجه هتتغير ولكن ساعتها محدش قبل".