استوقفني جملة قالتها المذيعة رضوى الشربيني في برنامجها "هي وبس" الذي يُعرض على قناة dmc ويركز على قضايا المرأة ويقدم نصائح اجتماعية وحياتية الجملة دي بسيطة اوي في شكلها بس تقيلة قوي في معناها لأنها بتكسر وهم قديم ناس كتير عايشة بيه: إن الحب لوحده كفاية.
الحب ما بيغيرش حد الحب بيكشف.
بيطلع اللي جوا الإنسان مش بيخلق فيه حاجة مش موجودة.
اللي كان محترم قبل الحب هيفضل محترم بعده واللي أناني مش هيتحول لشخص مختلف عشان قال “بحبك”. واللي ما بيعرفش يسمع ولا يحتوي ولا يلتزم الحب مش هيعلمه ده.
إحنا بنحب نصدق إن:
«معايا هيتغير»
«عشاني هيبقى أحسن»
«أصل الظروف مأثرة عليه»
بس الحقيقة المؤلمة إننا أحيانا بنحب الفكرة أكتر من الشخص نفسه.
من الناحية النفسية الست لما تفضل مستنية إن الحب يغير اللي قدامها بتدخل من غير ما تحس في دايرة اسمها التعلق التعلق مش حب التعلق انتظار. انتظار نسخة خياليه مش الشخص الحقيقي. المخ بيتعلق بالأمل ويمشي وراه حتى لو الواقع بيقول عكس كده.
ومع الوقت الست بتدفع التمن من نفسها ثقتها بتتهز صوتها يعلى شوية وبعدين يهدى احتياجاتها تتأجل ولما تتكلم تحس إنها بتطلب زيادة مش حق تبرر التجاهل وتعدي البرود وتستحمل الوجع على أمل إن بكرة يبقى أحسن.
بس السؤال الصح مش:(هو هيتغير ؟)
السؤال الصح هو:
(أنا هستحمل لحد إمتى؟)
الناس بتتغير لما تقرر تتغير مش لما تتحب. التغيير محتاج وعي ومسؤولية مش حد يفضل مستحمل على حساب نفسه وأخطر حاجة إن الحب أحيانًا يبان إنه غير الشخص شوية بس ده تغيير مؤقت قناع. أول ما الأمان يزيد الوش الحقيقي يظهر وأول ما تطلبي حقك يتقالك: إنتي اتغيّرتي.
عشان كده الست تعمل إيه؟
تشوف الأفعال مش الكلام تفرق بين اللي بيغلط وبيحاول يصلح واللي بيغلط ومستنيكي تتأقلمي.
من حقك تحبي بس مش من حق الحب يلغيكي.
ومن حقك تستني بس مش على حساب نفسك.
وفي الآخر زي ما قالت رضوى الشربيني: مافيش حب بيغير حد.
التغيير قرار مش مشاعر.
ولو لقيتي نفسك طول الوقت مستنية نسخة أحسن من اللي قدامك يمكن القرار اللي محتاج يتاخد مش إنك تكملي لكن إنك تختاري نفسك.
مش كل نهاية خسارة في نهايات اسمها نجاة.
