معقدة والدنيا بتعاند معايا.. شذى تعيش قصة حب جديدة
أعلنت الفنانة شذى من خلال لقاءها في البرنامج الإذاعي لمن يهمه الفن الذي تقدمه الإعلامية أميرة نور، عن أنها تعيش قصة حب حالية، ولكنها فضلت ألا تكشف عن هويته.
شذى تعيش قصة حب
وعن تفاصيل القصة، قالت شذى في لقاءها: “أه بعيش قصة حب، ولكنها معقدة شوية، أنا سبحان الله دايمًا الدنيا بتعاند معايا، بس أنا عارفة أن ربنا معايا وهيعمل الخير”.
وعن الأسباب التي يمكن أن تجعل القصة تنتهي، قالت شذى: “أن طرف من الطرفين يبقة مش عايزها تكمل، لو الطرفين عايزنها تكمل هتكمل، لو في طرف ممكن يكون بيحبك جدًا بس معندوش خلق، بس أنا كبرت لدرجة أني بقيت سيباها على ربنا”.
كواليس انفصال شذى
وعن انفصالها، قالت شذى في ذات اللقاء: “اللي حصل حصل، وأنا مش من المدرسة أني اتكلم في حق حد، لأني بنت ناس الحمدلله، واتعلمت أن اللي في البيت يفضل في البيت، ممكن أقول أن انا منبسطتش من التجربة، اتسرعت كتير، وده مش معناه أن حد فينا سئ، أحنا الاتنين كويسين بس النتيجة أننا منبسطتناش بس، كنا راسمين لحياتنا شكل وفي الحقيقة طلع شكل تاني خالص، الموضوع مكنش له علاقة أبدًا بالماديات، الموضوع كله أن كان في دماغك أن الشريك ده يدعمك في شغلك ويشجعك، ويهتم باهتماماتك ويفرح لفرحك، أبسط حاجة أن كان في نوع أكل بنحبه زي بعض، بعد كتب الكتاب طلعنا مس بنحبه زي بعض، أي فنان هو إنسان وكان كل اللي كنت عايزاه أمان احتواء راحة، وخصوصًا واحدة بظروفي مكنتش عايزة غير ده، ومش فارقلي الفلوس خالص، ومع ذلك مش هقدر أخد حد اقل مني ماديًا عشان اقدر احترمه، يمكن لو أمي كانت عايشة الموضوع ده مكنش حصل أصلًا حقيقي أنا اتصدمت”.
شذى تتعاقد مع روتانا
وفي سياق منفصل، قد أعلنت شذى مؤخرًا عن تعاقدها رسميًا مع شركة «روتانا» للصوتيات والمرئيات لتتولى إنتاج وتوزيع أعمالها الغنائية خلال الفترة المقبلة، في خطوة تمثل إضافة قوية لمسيرتها الفنية.
وكانت مجموعة روتانا للموسيقى قد طرحت أيضًا أغنية «زمانك دلوقتي» للنجمة شذى عبر موقع يوتيوب والمنصات الموسيقية المختلفة. الأغنية من كلمات عليم، وألحان مصطفى العسال، وتوزيع أحمد حسام وإلهامي دهيمة، وتم تصويرها بطريقة الفيديو كليب تحت إدارة المخرج محمد عبد الجواد.
