«حتى لو أنتي اللي ظالماه».. ياسمين عز تثير الجدل: «ادعي على الإكس وحسبني عليه»
تصدرت الإعلامية ياسمين عز محركات البحث ومنصات التواصل الاجتماعي مجددا، بعد أن وجهت رسالة للفتيات، محذرة من «موسم عودة الإكسات»، تزامنا مع احتفالات العام الجديد.
مفيش حاجة اسمها إكس
بدأت ياسمين عز حديثها من خلال برنامجها «كلام الناس» المذاع على شاشة «mbc مصر» قائلة: «بالنسبة للإكس في السنة الجديدة، مفيش حاجة يا بنات اسمها إكس.. خلاص، الإكس ده ما بترجعلهوش وما بتحنلوش وما تعرفوش أصلا الإكس ده تحسبني عليه بس، وتدعي عليه يجيله ويحط عليه، حتى لو كان كويس والعيب فيكي أنتي، وأنتي اللي ظالمة ومفترية ومطلعة عينه وسايباه قرفة.. برضو تدعي عليه».
تحذير من رسائل الإكس
وحذرت ياسمين الفتيات من الانخداع بالرسائل التي قد تصلهن في هذه الفترة، قائلة: «خلي بالك، اليومين دول موسم عودة الإكسات، هتلاقي رسالة فجأة مكتوب فيها كل سنة وأنتي طيبة، أو سنة سعيدة، أو الجملة الشهيرة وحشتيني».
مشاعر احتفالات رأس السنة
واستطردت ياسمين عز موضحة حقيقة هذه المشاعر: «هتلاقيه بقى حنين أوي اليومين دول، بس ده مش معناه إنه بيحبك وهييجي يزوركم ويخطبك بـ 2 كيلو دهب يا زليخة.. فوقي»، مستطردة: «دي مشاعر مؤقتة عشان أجواء السنة الجديدة وهتخلص أول ما الاحتفالات تخلص، فما تتخدعيش».
الرد المثالي
وتابعت ياسمين عز: «ما ترديش يا حبيبتي، كملي في بيجامتك الدافية عادي جدا كأن مفيش حاجة حصلت، واشربي مشروبك الدافي وانبسطي.. وكل سنة وأنتي طيبة».
ياسمين عز: الراجل مش خاين
وفي سياق سابق، أعلنت ياسمين، خلال برنامجها "كلام الناس" المذاع على قناة mbc مصر، إلغاء كلمة "الخيانة" من القاموس الزوجي لهذا العام، مواصلة: “مفيش حاجة اسمها راجل خاين.. الراجل اللي يعرف ستات كتير ده بيبقى اسمه متعدد علاقات مش خاين.. زيه زي موظف الـ HR اللي بيدير علاقات العمل”.
ووجهت ياسمين نصيحة للزوجات قائلة: “بطلي دور المخبر والمحقق ده، وممنوع أسئلة من نوعية إنت فين؟ وجاي إمتى؟.. عشان الفرعون ميزهقش”.
وتابعت: “غيروا طريقتكم في الرد، يعني لو سألك مالك؟ بلاش تردي بكلمة ماليش النكدية، وقوليله وإنت مالك من باب الهزار والمفاجأة عشان تكسري الملل”.
ياسمين عز: البيجامة الفار
وفي سياق متصل، هاجمت ياسمين عز "البيجامة الفار" والطبقات الكثيرة التي ترتديها النساء في الشتاء، قائلة: "جوزك مش متجوز الدب القطبي عشان يشوف المنظر ده.. فين الروب الستان والشبشب أبو ريش؟".
وأضافت ياسمين عبر برنامجها "كلام الناس" على قناة "إم بي سي مصر": "لو بردانة وماعندكيش دفاية، طلعي صورك أيام الخطوبة.. الدم هيجري في عروقك وهتتدفي".
