أول متسلقة مصرية لقمم الجبال.. منال رستم تروي طفولتها ورحلتها من الصيدلة للقمة

حلت متسلقة الجبال المصرية العالمية منال رستم ضيفة على برنامج «ست ستات» المذاع على شاشة «دي إم سي» مع الإعلامية سناء منصور، لتروي قصة نجاحها التي بدأت من شغف طفولي بالرياضة، وانتهت برفع علم مصر على أعلى قمم الجبال في العالم.

الحلم يحتاج قلب قوي

وقالت منال: «كنت دايما مؤمنة إن الحلم مش محتاج أجنحة، بس محتاج قلب قوي.. أنا ماخدتش الطريق ده عشان الشهرة، أخدته عشان روح المغامرة والإحساس بالتحدي».

وأضافت أن القوة الحقيقية تأتي من التغلب على الصوت الداخلي الذي يحاول إحباطك، مؤكدة:
«اللي يقدر يواجه الجبل بظروفه وقسوته، يقدر يواجه أي تحدي في حياته».

البدايات.. من الكويت للجري

وعن طفولتها، تابعت منال رستم: «أنا اتولدت وعشت في الكويت، ومن وأنا عندي 8 سنين وبدأت أمارس الرياضة، من ركوب العجل للباتيناج والسباحة.. ووالدي كان دايما يشجعني، وكنت دايما بشارك في سباقات المدرسة لمسافات 100 و400 و800 متر، وده اللي خلايا أعشق الجري».

الصيدلة مقابل الشغف

ولفتت إلى أنه رغم تفوقها الأكاديمي ودخولها كلية الصيدلة وممارسة المهنة، الإ أنه: «مفيش علاقة مباشرة بين الصيدلة وتسلق الجبال، بس في فرق بين المسار المهني والشغف.. وشغفي هو الطبيعة والمغامرة، وقررت أحول الشغف ده لشغل، عشان لما تعمل اللي بتحبه مش هتحس إنك اشتغلت يوم في حياتك».

رسالة دعم للمرأة المصرية

وجهت أول فتاة مصرية تصل لقمة إيفريست رسالة للفتيات: «الطريق بيبدأ بالحركة والسعي.. والقمة هتظهر لما ترفع راسك وتواجه ظروفك.. والجبل بالنسبالي كان رمز للخوف والشك، ولما تعديه، كل الصعوبات التانية هتبقى صغيرة قدامك».

وفي وقت سابق، في واحدة من أكثر اللحظات درامية وإثارة، كشفت منال رستم، أول مصرية تصل إلى أعلى قمة جبلية في العالم، عن تجربة إنسانية وإنقاذ غير متوقع أثناء مغامرتها الأخيرة في جبال نيبال، حيث تعرضت لأزمة صحية كادت أن تضع حدًا لحلمها الجبلي.

وقالت منال، خلال مداخلة هاتفية مع برنامج "كلمة أخيرة" الذي تقدمه الإعلامية لميس الحديدي على شاشة ON، إنها كانت على ارتفاع 5180 قدم عندما بدأت تشعر باختناق شديد ونقص حاد في الأكسجين، مضيفة:"كان شعورًا مرعبًا.. لم أستطع التنفس بشكل طبيعي، وبدأت أفقد التركيز تدريجيًا."