رصيدك كزمالكاوي تحت الزيرو..محلل رياضي يعلق على رحيل زيزو عن الزمالك
هاجم المحلل الرياضي واليوتيوبر عمرو نصوحي، الطريقة التي اعتمدها أحمد سيد زيزو لاعب الزمالك وكذبه على جمهوره في بيانه الأخير.
وكتب نصوحي عبر حسابه الشخصي بموقع التواصل الإجتماعي إكس: "اول ما قريت بوست زيزو من يومين اقتنعت وصدقت كلامه لانه الحاجة الوحيدة المنطقية، كلام متناسق مع كل اللي قاله قبل كدة واخره في فبراير مع إسعاد يونس ومختصره الزمالك اولا وجمهور الزمالك قبل اي حاجة وهما اللي عملوني، أنا مش قادر اتخيل اي حد بيتفق على مرتب السنة في الشغل واجي في الاخر ألاقي نفسي واخد اقل ومش بقبض ٣-٤ شهور زي ما بنسمع، حاجة تخلي الواحد يطفش من المكان اللي بيحبه ويمشي، ولو جامد العالم الكله هيبقا عايزه وعارض عليه أضعاف الفلوس… والكلام ده احنا كجمهور مش بنحس بيه لاننا عمرنا ما هنعرف نحط نفسنا مكانه بكل المغريات دي".
وتابع: “بس انت بردو عارف وشفت ان لما الجمهور بيقف في ظهرك بيخلي حتى الادارة اللي فشلت تماماً في كل ما سبق وزيادة تجيلك وتديك كل اللي انت عايزه، فلما تيجي بقا اللحظة اللي تقرر تمشي فيها عشان مابقتش قادر تستحمل والعروض كثير وتبقا عايز تدي لنفسك حقها عليك، فتقرر تروح الاهلي وتكذب يبقا كل الهري اللي فوق ده مالوش اي ثلاثين لازمة ولا يخصني ولا يهمني ولا تعرف تشتري بيه مني بثلاثة تعريفة تعاطف، ده انت طلعت ماضي وكل مصر عارفة وبتحور على الناس الوحيدة اللي صدقتك!”.
وأضاف: " قاعد بتغني معاهم في المدرج وانت موقع ومخلص وطالع تقولي بعد الجول "you can’t see me" ده ايه الجبروت ده.. انت مين ؟! والعيب عمره ما بيبقا على اللي صَدَّق، العيب بيبقا على اللي بيكذب، الحركة دي بالنسبة ليه تعدي ليفل فيجو لما راح مدريد من برشلونة وتعدي اي حد راح الاهلي من عندنا قبل كدة بما فيهم امام بكثير".
واختتم: "ده مش اول ولا آخر لعيب يسيبنا ويروح الاهلي بس احنا كنا فعلاً فاكرينك مختلف… وحطيناك جنب اسامي كبيرة اوي في قلوبنا وبيوتنا وانت عارف.. بس على قد مقدار الحب على قد مقدار الاحساس بالقرف،يلا بالف سلامة ولا حتى من غيرها احسن بردو.. رصيدك معايا كزملكاوي تحت الزيرو".
زيزو يؤكد رحيله بهذا البيان
وتأكد رحيل زيزو عن نادي الزمالك، بعد البيان الذي أصدره اللاعب أمس الثلاثاء، ينتقد من خلاله الإدارة في ملف تجديد عقده، وعلى أثره، قام المجلس بتجميد اللاعب وتحويله للتحقيقات واستبعاده من المشاركة في مباراة الفريق الأبيض أمام بطل جنوب إفريقيا، وظهور اللاعب وهو يتدرب منفردًا مع قائمة اللاعبين المستبعدين.
وكان والد زيزو هاجم مجلس الإدارة برئاسة حسين لبيب في تصريحات تلفزيونية لقناة (المجور).. قائلا :" مجلس غير قادر على تحمل المسؤولية، هدفهم تسليم ابني للجماهير وعلى صفحات التواصل الاجتماعي، من خلال التسريبات وأطالبهم بالخروج لمواجهتي، وأنا قادر على كشف أمور ستجبرهم على الجلوس في منازلهم وعدم الخروج والذهاب مرة أخرى إلى النادي، هذا المجلس تعامل بإهانة مع ابني وطلبوا من بعض الجماهير مهاجمته وسبه، وبالعامية كده داسو على كرامته، وعرضت على حسين لبيب أكثر من مرة عروض بملايين الدولارات من الخليج، لكنه بالعامية كده خاف من غضب الجماهير، وقلت له نصا: زيزو شاري الزمالك.. خد قرار وجدد ولو مفيش فلوس.. وافق على العرض اللي يرضي النادي، لكنه تهرب من اتخاذ أي خطوة ".
