منتقبة ترفض كشف وجهها أمام موظفي بنك مصر.. وخالد منتصر يهاجمها
علق الكاتب الدكتور خالد منتصر، على واقعة رفض شاب أن تكشف زوجته المنقبة عن وجهها، أمام أحد عملاء بنك مصر، ليطابقوا صورتها بصورة البطاقة.
وقال خالد منتصر في منشور له عبر حسابه على فيسبوك: الحقيقة موقف موظف ومدير البنك اللي أصروا على رفع السيدة للنقاب حتى يطابقوا صورتها على صورة البطاقة،
موقف سليم وصحيح وقانوني، والأهم أنهم لم يخضعوا للابتزاز الديني، وفزاعة الشرع والحرام ..الخ.
وتابع منتصر: ما ينفعش أنت تقرر حاجة طلعت في دماغك، وعايز الكون يتشكل على مقاس قرارك، إنتي قررتي تخفي هويتك بالنقاب، إنتي حرة، بس ده في بيت حضرتك، لكن حتخرجي للمجتمع وتتعاملي معاه، لازم تخضعي للقانون الاجتماعي ده.
وأضاف: تتصوري بوشك للبطاقة وللرخصة وترفعي النقاب في البنك وترفعيه وانتي بتسوقي العربية وانتي في المطار وانتي بتشتغلي مدرسة وممرضة ..الخ.
وأردف الكاتب الدكتورخالد منتصر: سياسة فرض الأمر الواقع ودبح القطة ما تنفعش،
عايزين تعتزلوا الدنيا وتزهدوها أوكي، بلاش بقى تفرضوا قانونكم على الشارع ،
واختتم خالد منتصر حديثه قائلا: الوجه هوية، ولازم كل واحد في أي مؤسسة يعرف هوية اللي قدامه، غير كده يبقى إحنا في حفلة تنكرية أو بنلعب استغماية في بيت أشباح مش في مجتمع ولا في دولة ولا في القرن 21.
وكان صاحب حساب" إسلام محمد" كتب عبر فيسبوك : هحكي الموقف دا لأني كنت في البنك الأهلي وحصل نفس الموقف وبصراحة الموضوع مستفز جدًا.
من سنة تقريبًا كنت بخلص معاملة في بنك مصر لزوجتي وزوجتي منتقبة.
خلصنا في خدمة العملاء، الموظفة كانت بنت، فتأكدت من صحة كل البيانات وحولتنا للتيلر علشان نسحب الفلوس، والتيلر عبارة عن 4 موظفين، 2 بنات، اتنين شباب، المديرة ست كبيرة والمسافة بين كل واحد والتاني نصف متر.!!
فبقول للموظف حولنا بالرقم لزميلتك بحيث لو هتخليها ترفع النقاب علشان مراجعة البيانات وكدا، قالي مش هينفع طالما الرقم جالي هنا، ولازم أنا أشوفها وأتأكد من صحة البيانات.
بقوله طيب ما طالما الموظفة موجودة يا تخلي المعاملة معاها ودي حاجة بسيطة حضرتك تقدر تعملها أو تخلي الموظفة أو المديرة تتأكد لك من صحة البيانات وتشوفها، قالي مش هينفع بطريقة في رخامة غير مبررة.
قلتله طالما في حد يقدر يقوم باللي حضرتك هتعمله وأنا طلبت، ودي رغبتي فـ الطبيعي والأخلاق إن يبقى الطلب متاح لأنك في النهاية مؤسسة بتخدم عملاءها.
عموما دخلني لمديرك.
دخلت للمدير اللي مفروض فاهم أكتر، مرن أكتر، متدارك لمواقف زي دي.. المدير رد عليا قالي مش هينفع، قلتله هو إيه اللي مش هينفع؟ الكلام دا لو كل اللي شغالين في الصالة عندك رجالة بس فأنا ساعتها مجبر ومفيش حل أو أشوف فرع تاني فيه بنات لو أنا متمسك بطلبي.!
لكن لما يكون عندك نص التيم في الصالة بنات وفي موظفين بنات في التيلر بالفعل وتقولي مش هينفع يبقى مجرد تعنت إداري ملوش تفسير بصراحة ولا حتى من باب الأخلاق إنك ترفض طلب متاح.
ولا حتى من باب الأخلاق إنك ترفض طلب متاح يتعمل في مكان أنا عميل فيه وإنت بتقدملي خدمة، سكت شوية لما حس إن عادي وليه لأ طالما فعلا في موظفين، لمّ الدنيا وقال للموظفة تراجع البيانات مع زوجتي وأخدنا فلوسنا وتمام.!
طيب ليه من الأول دا مش متاح طالما رغبة العميل كدا؟ فين المشكلة إنك تنفذ طلب العملاء من باب إرضاء العميل وتتأكد وتاخد كل بياناتك بدون ما تجرح الناس.
