فاكرين فيلم النضارة السودة لنادية لطفي؟ فيلم فيه معاني كتيره مش النضارة نفسها اللي شدتني ولا جمالها لكن قصه الفيلم روعه لكن خلينا نتكلم عن الإحساس اللي وراها شعور الإخفاء القرار إنك ما تشوفش الحقيقة ده اللي لسه عالق في دماغي.
في حياتنا ساعات بنكون شايفين كل حاجة بس قررنا نتغاضى عن كلام بيوجعنا ونقول اصل مش قصده او تصرف مش لطيف؟ ونقول أصلها تعبانة برود تجاهل خذلان؟ بنلبس نضارة سودا ونمشي ونقنع نفسنا إن ده كله طبيعي أو مؤقت أو انه هيتغير.
بس الحقيقة احنا بنختار ما نشوفش بنحب الصورة أكتر من الشخص وبنرتبط بالأمل أكتر من الواقع بنستثمر مشاعرنا في حاجة محتاجة تصليح مش انها تستمر معانا .
النضارة السودة دي موجودة في كل حاجة:
في العلاقات العاطفية اللي بنحب فيها فكرة الحب أكتر من الشخص نفسه.
في صداقاتنا اللي بنسمح فيها بسلوكيات مضايقانا بدل ما نواجه.
في الشغل اللي نغض فيه النظر عن اللي ما ينفعش علشان فرصة .
حتى مع نفسنا نخاف نواجه ضعفنا وأخطائنا وخوفنا من البداية من جديد.
وبعدين في لحظة النضارة السودة بتقع من كلمه او موقف او تصرف صغير كل حاجة كانت باينة بس اخترنا مانشوفش وساعتها بنفتكر كل الإشارات كانت موجودة من الأول بس قررنا ما نشوفش.
وبنكتشف إن التغافل مش حب ولا نضج ولا طيبة التغافل أحيانًا هروب.
الهروب ده ممكن يكبر لدرجة يضيع فيها إحساسنا بنفسنا لدرجة نخسر فيها علاقتنا ببعض الناس وحتى علاقتنا بنفسنا.
بس خلع النضارة مش ضعف ده شجاعة بس شجاعة لنفسك ولقلبك ولحياتك اللي تستحق شفافية.
الوضوح أحيانا بيوجع أحيانا بيكشف حاجات كنا بنتمني تفضل مستخبية بس في الآخر الوضوح هو الأمان الحقيقي.
نصايح عملية علشان تخلع النضارة السودة من حياتك:
-بص لنفسك قبل ما تبص لحد اعرف واقف فين وإيه محتاج تغييره في حياتك مش بس في الشخص اللي قدامك.
-متغضش عن اللي يوجعك:
الفرق بين التغاضي المؤقت والتغاضي المستمر اللي بيهدم كل علاقة.
_اعترف بمشاعرك:
مش كل حاجة محتاجة تصفيق اعترف لما تتضايق أو تتجرح.
-شوف الحقيقة من غير فلتر:
كويس تشوف العيوب والحقيقة كلها ده مش قسوة ده واقعية.
-ما تخافش من القرار:
خلع النضارة السودة مش ضعف ده شجاعة. شجاعة لنفسك ولقلبك ولحياتك.
-حدد حدودك:
مفيش حاجة اسمها تتحمل كل حاجة اعرف حدودك وما تسمحش لحد يتخطاها.
-استثمر في اللي بيقدرك :
ماضيعش وقتك في حد مابيقدركش او بيخليك تحس بتقصيرك في العلاقة.
النضارة السودة حلوة في السينما بس في الحياة الواقعية؟ الوضوح هو الأمان والحقيقة أهم من أي فلتر أو قناع.
