طارق الشيخ عن وصية أحمد عامر: اللي يحذف أغانيه بيحذف تاريخه.. والغناء مش حرام
كشف المطرب الشعبي طارق الشيخ رأيه في وصية المطرب الراحل أحمد عامر، والذي أوصى بحذف أغانيه بعد وفاته.
وقال طارق الشيخ خلال لقائه في برنامج كلمة أخيرة مع الإعلامي أحمد سالم على قناة ON:"مبقتنعش بالكلام ده، لأن لو شيلتها أنت شيلت تاريخك ومش هتمنع حد يغنيها، وكده كده مش هتتشال، ولو أنا حاسس أن مهننتي حرام مش هغني، دي موهبة ربنا أدهالي ومأذتش بيها حد ولا سببت ضرر لحد ولا قلت كلمة تخدش حياء حد ودي حاجة محافظ عليها، وربنا بيحاسب كل واحد على كل اللي قلبه".
وأبدع طارق الشيخ في غناء كتاب حياتي يا عين، وقال عن سر نجاح حسن الأسمر:" معندوش أغنية فيها كلمة وحشة ولا كلمة فيها قلة أدب، والشريط كان بيعدي على المصنات مرة واتنين مش دلوقتي المطرب وهو قاعد بيعمل الأغنية وتنزل وقت ما هو قاعد، كان 90% من أغانيه في البيوت مش في الشارع بس، وربنا كان مديله حاجة تقول ده حسن من على بعد".
وأكد طارق الشيخ أنه لا يوجد ابن خليفة لوالده،:"مفيش ابن خليفة ابوه في أي مهنة، كل واحد ربنا مديله ملكة".
وتحدث طارق الشيخ عن نشأته في منقطة الشرابية، وقال:" أنا متربي في منطقة شعبية في الشراببية ولسه بروح هناك، ووالداتي هناك وصحابي وعشرة عمري".
وعن رأيه في غناء المهرجانات وإذا كانت تكمل الغناء الشعبي:"للأسف جو المهرجانات اللي سايقه الجيل الصغير، لكن الجيل الكبير ما يسمعش الحاجات دي، الكبير اتعود على أن الأغاني فيها مزيكا تشجيه، حتى لو هتفرحه بيكون فيها مزيكا، لكن المهرجانات الكبير بينفر منها والصغير واخده على أنه طبلة وبيحفظه بسرعة حتى لو أربع صفحات لأنها تركات من غير مزيكا".
