إبراهيم فايق يوضح فلسفة «قهوة فايق»: حوارات كروية بلا قيود
استعرض الإعلامي إبراهيم فايق رؤيته حول برنامجه الرياضي «قهوة فايق»، موضحًا فكرة القعدة المفتوحة التي تجمع ضيوفًا من خلفيات مختلفة لطرح آرائهم في كرة القدم، مع التأكيد على أهمية الاحترام المتبادل وتقدير الفرص والتجارب، سواء كانت ناجحة أو معرضة للإخفاق.
جاء ذلك في منشور عبر حسابه على منصة «إكس»، قال فيه: «قهوة فايق مش برنامج، دي قعدة كورة مفتوحة. في كل حلقة بيظهر ٦ ضيوف، بتسمع وتشوف فيهم كل الأصوات وكل الآراء، جميع الآراء. هي فكرة القهوة كده، أنماط مختلفة وشخصيات مختلفة وأفكار جدلية زي اللي بتقابلها على القهوة. مش هينفع كل الناس تتكلم نفس اللغة ويبقى عندها نفس الطريقة والأسلوب والفكرة، إلا ساعتها يبقى حوار نمطي عادي جدًا، قعدة مش حقيقية، بلاستيك ومفيهاش روح».
وأضاف بقوله: «متفهم جدًا حب الجمهور لقعدة القهوة، وده شرف كبير جدًا، لكنه شدد على أن المحتوى كروي تقريبًا، والجمهور بيسمع رأيه من خلال ٣٠ ضيف هيتابعهم على مدار ٥ أيام، وبالتالي مستحيل يتوافق مع جميع الضيوف».
وتابع: «كابتن أسامة نبيه مكانش موفق في تصريحاته بعد خروجنا من كأس العالم، وتجربته مكانتش ناجحة وكلنا أقرّينا بكده. لكنه زي أي شخص في أي مجال عنده تجارب ناجحة برضه. الراجل كان مدرب عام منتخب مصر مع هيكتور كوبر اللي صعد بكأس العالم ووصل نهائي البطولة الأفريقية. فأي مدرب أو لاعب معرض للإخفاق، ومش معنى كده إنه ينتهي ونقضي عليه، لا يدرب تاني ولا يتكلم في الكورة تاني. اللي بيغلط عنده فرصة يطور من نفسه ويحسن من أداؤه ويرجع تاني. ليه مؤمنين بالفرصة التانية لما إحنا نخفق، إنما مش مؤمنين بالفرصة التانية لما غيرنا يخفق؟».
وأوضح على المستوى العالمي، أن «اللاعبين والمدربين بيرتكبوا أخطاء وإخفاقات كبيرة، وموجودين وبيتكلموا في الكورة بحكم خبراتهم وأفكارهم».
وواصل بقوله: «الكورة آراء ووجهات نظر، وجمالها في جدليتها. ازعل مني لو قدمت لك ضيف بيخرج عن الإطار، وانتقدني لو ظهر عندي ضيف تجاوز أو غلط. أنت جرّبتني وعارف إني بسمع لك، ولما حصل تجاوز انت شوفت تصرفنا كان عامل إزاي، لأني بعتبرك شريك في البرنامج. كلنا معرضين للنجاح والفشل».
وأشار: «ولو أنا قدمت حلقة وحشة، هتقولي اقعد في البيت مش عايز أشوفك تاني؟ أوعى تقول آه».
وختم فايق قائلاً: «صباحكم زي الفل، وربنا يعلم بحبكم قد إيه، وبحب أستغل الفرص اللي ممكن تخلق أرضية نقاش واحدة وقريبة».
