عاجل

زيزو يفتح النار على مجلس الزمالك: لم أوقع للأهلي.. واتشتمت 4 مرات بسببكم

زيزو
زيزو

تحدث  أحمد سيد زيزو لاعب فريق الزمالك، عن تجديد تعاقده مع الأبيض بعد انتهاء عقده مع الأبيض، بالإضافة إلى حقيقة انتقاله إلى النادي الأهلي خلال شهر يونيو المقبل. 

تصريحات زيزو 

 

وقال زيزو في تصريحات نقلها عنه الإعلامي هاني حتحوت: أنا في غاية الإحباط من اللي حصل معايا الشهور اللي فاتت، انا مش مصدق ان دي المعاملة اللي تتعامل مع لاعب عمره ما قصّر في حق النادي، في خلال الشهور اللي فاتت، أبويا اتعرض لكل أنواع الهجوم والتجاوز على مواقع التواصل الاجتماعي بدافع من أشخاص في الإدارة.. أبويا راجل محترم، مش أقل من أي واحد منهم.

وأضاف: أبويا ده هو اللي جدد عقدي مع الزمالك مرتين قبل كده وماخدش فلوس، وهو وكيلي ومن حقه ياخد عمولته، ما أنا ممكن أجيب وكيل وياخد فلوس وأديها لبابا، بس أنا مش بتاع الحركات دي.. بس المشكلة الحقيقية في السمسرة اللي بتحصل في الصفقات التانية، ندخل في جلسة، قبل ما نخرج منها نلاقي التفاصيل نازلة على المواقع، بالشتيمة عليها

وتابع:  مرتضى منصور رئيس نادي الزمالك السابق،  بعت عربية للمنيا تجيب لوالدي، ساعتها كلمت بابا قلتله "هنمضي بالرقم اللي هيحطوه"، وانا اللاعب الوحيد في تاريخ الزمالك اللي اتشتم 4 مرات ورا بعض من جمهور الزمالك.. بسبب الإدارة.. انا الجمهور يستنى ماتش بتروجيت يخلص عشان يقول لي "روح يا زيزو؟"، الجمهور هو الحاجة الحلوة الوحيدة اللي في الزمالك، حتى دي خلوها مش حلوة.
وأردف:  أنا مش مشكلتي الفلوس خالص، أنا مشكلتي التقدير، أنا مش أعلى لاعب مصري حاليا في الزمالك، ولا أجنبي دون التقليل من أحد ومش ببص لحد في رزقه، أنا اتغير عليا 7 مجالس إدارات وعمري ما تمارضت، ولا غبت عن تدريب، ولا قلت بطني واجعاني ولا رجلي مش قادرة.

وواصل: هشام نصر نائب رئيس الزمالك قال إني طلبت أكتر من 60 مليون، والله ساعتها ما كنا اتكلمنا في أرقام لسه، لكن كان ساعتها الزمالك رفض عرض نيوم آخد فيه 11 مليون دولار في سنتين، فبابا قال هتعوضوه ازاي طيب؟ 20% ولا 30% ولا 50% من المعروض؟ فهو حسبها وطلع قال زيزو عايز أكتر من 60 مليون. فكلمته قلتله أيوة أنا بقى عايز أكتر

وأكمل: خلوا الناس تعد عليا النفس، والعمال في النادي يقولوا وانا ماشي "النادي خد قرض ب200 مليون عشان ندي 150 منهم لزيزو".. هل دي أجواء شغل، ايوة الزمالك اللي عملني وشهرني، بس بالتزامي بقيت الوحيد اللي بينافس على جايزة افضل لاعب في افريقيا ، وميدو بيتكلم عن تجديدي، لكن في ماتش مودرن قبل ما اعمل الأسيست في الكاس، كان في الماتش بيهاجمني ويقول بقى ده اللي عايز الملايين دي؟

واستطرد: حسين لبيب واحنا في الطيارة راجعين من المغرب وقت جايزة افضل لاعب، قال لي المقدم اللي اتفقنا عليه صعب نجيبه، الزمالك هيدفع كذا وممدوح عباس كذا، وهندفع الباقي في شكل فيلا ينفع تتصرف فيها بعد سنتين، وعمرو الجنايني، بحبه وبحترمه لانه عايز مصلحتي وانا عارف، وهو اللي انا رديت عليه الايام اللي فاتت، لكن مايصحش يقول للوسيط لو زيزو ماردش خلال اسبوع هننزل بيان!!بيان؟ انتوا اصلا افتكرتوني غير بعد ما جبت جولين مع المنتخب وجول الكاس قدام سيراميكا؟

وشدد:  بقالي 7 شهور بتحايل عليكم نجدد، مش عشان محتاج فلوس، ده عشان أساعد الإدارة تبقى الطرف الاقوى قبل ما ندخل في الوقت الضايع، ده انا كنت بغشش حسين لبيب يتعامل مع بابا ازاي ويقول ايه عشان نوصل لحل.. في الاخر يقولوا لي قدامك اسبوع؟ لا طبعا مش قدامي اسبوع

وواصل: انا والله رحت لشيكابالا بعد رفض أحد العروض، قلتله ارجوك اتصرف مع الادارة وخليهم يجددوا، وأحد المسؤولين الفترة اللي فاتت قال لي "طيب مش لازم تكمل في الزمالك.. لكن ماتروحش الاهلي".. هل هي دي العقلية السليمة؟ بدل ما نواجه ونقلل الفوارق مع منافسنا؟، وهم اللي وصلوني لان بقى قدامي اختيارات كاملة، وعلى فكرة والله العظيم عرض الزمالك هو الاقل ماديا، سواء من بره مصر او حتى العروض المحلية.. وماقصدش الأهلي بس.

 

وتابع: ماوقعتش للأهلي، وماليش دعوة بابا وقع على ايه ولا خد شيكات ولا لا.. الناس بتقول مخلص كل حاجة، وانا لو كنت مخلص كنت هروح جنوب افريقيا في رحلة 17 ساعة من غير جيم ولا سبا ولا ملاعب ولا حتى فندق كويس؟ لكن الأهلي نادي محترم بحترمه زي ما بحترم الزمالك وجمهوره، وحقي العب فيه، والتاريخ مش بيتمسح. ، أنا طلبت من الزمالك شيكات مكتوبة بس عشان اضمن حقي، العقد شريعة المتعاقدين، وليه تخسر واحد أثبت لك أكتر من مرة انه بيحبك؟

 

وأختتم زيزو تصريحاته قائلا: مش همسك قلم وامضي غير لما أحسم موضوع الزمالك، وده اللي قلته لبابا، ومافيش حاجة اسمها توكيل عام في عقود الكورة، ممكن في الاعلانات او عقود تجارية، أبويا لحد مارس ماقعدش مع ولا نادي احتراما ليا ولرغبتي!

تم نسخ الرابط