ضبط النفس السبب.. تامر حسين يوضح سر نجاح النجوم في أي مجال
أوضح الشاعر تامر حسين عن سر نجاح النجوم في أي مجال، وأن سبب نجاحهم هو ضبط النفس، وذلك من خلال حسابه الرسمي على موقع التواصل الإجتماعي فيسبوك.
منشور تامر حسين عن سر نجاح النجوم
وقال تامر حسين في منشوره: "كُل الأساطير اللى جوم ف أى مجال فني أو رياضي أوغيرهُ بعيداً عن موهبتهم العظيمة اللى خّلِدهُم وإداهم إستمرارية ونجومية ومكان كبير فى قلوبنا وغلاوة وتقدير وإحترام كبير من وجهة نظري الشخصية وفرقهم عن غيرهم أن كان عندهُم ( ضبط النفس)، ف عز نجاحهم ماكنش بيغُرهم النجاح ويحافظوا على أقوالهم وأفعالهم وإتزانهم، فى عز الهجوم عليهم والظُلم من كمية ناس عايزة تنال مِنهم، كان التجاهل أكبر سلاح يردوا بيه إلا فى حالات إستثنائية تستوجب الرد، حاسس إن السوشيال ميديا ل الأسف بتصدرلنا مؤخراً من بعض الفنانين (المضغوطين نفسياً) وعندهم حرب إثبات الذات
والإستحقاق خناقات مالهاش دعوة تماماً ب الفن و بقيمتك كمُبدع ومؤثر، بالعكس بتقلل تماماً من الشخص الفنان ف عين مُحبينهُ النجاح دائماً وأبداً باين زى الشمس مش محتاج تشاور لحد عليه".
تجاهل أحمد العوضي للأنتقادات
جاء ذلك بالتزامن مع تجاهل أحمد العوضي كافة الانتقادات التي وُجهت له بسبب تصريحه الأخير بكونه الأعلى أجرًا في مصر، حيث قال أحمد العوضي في لايف عبر الحساب الرسمي له علي موقع فيسبوك :"أنا النجم الأعلى أجرًا في مصر والأعلى مشاهدة والأعلى مبيعًا .. والحمد لله ده بفضل ربنا وبدعم إخواتي ليا .. وأقل حاجة أقدمهلكم المسابقات .. وإن شاء الله أفضل رقم واحد .. ويبقى الفرق بيني وبين رقم إتنين وتلاتة زي من هنا لمطروح".
أحمد العوضي في فهد البطل
وقال أحمد العوضي خلال اللايف: “فهد البطل هو الأعلى بحثًا في مصر في 2025 .. وهو رقم واحد زي ما كان فهد البطل هو الأعلى في 2024 .. وده كله بفضل ربنا ودعمكم .. وإن شاء الله علي كلاي السنة الجاية يبقى الأعلى .. ونبقى كده حققنا الأعلى مشاهدة 3 سنين ورا بعض”.
أبطال مسلسل علي كلاي أحمد العوضي
كما أكمل أحمد العوضي كاشفًا عن أبطال مسلسله الجديد علي كلاي : “معايا في علي كلاي زميلتي النجمة درة لأول مرة .. وهتشوفوها بشكل جديد .. ومعانا طارق الدسوقي وعصام السقا ويارا السكري ورحمة محسن وسارة بركة وضياء عبدالخالق وأحمد عبدالله محمود وميدو ماهر .. وكلهم إخواتي وحبايبي .. وكمان محمد ثروت وريم سامي”.
وواصل : “هتشوفوا مسلسل ضخم .. فيه كل حاجة .. فيه أكشن ودراما عائلية ورومانسية .. وصراعات في الإطار الشعبي اللي بتحبوه مني”.
