ال date كلمة سمعناها مؤخرا وأول ما أسمعها بييجي في دماغي خروجة بين اتنين كبار
لكن أنا بطريقتي قررت أخدها بطريقة مختلفة مع ولادي.
مش لازم دايما تكون أيام كلها عصبية وأوامر ونصايح طويلة ممكن نعمل Date بسيط نقولهم فيه انا موجودة بكل قلبي من غير موبايل من غير جدول ومن غير ضغط.
ال date بالنسبة لي مش علشان أصلح سلوكهم ولا أغير في طباعهم ولا أدي محاضرة ده بس وقت أسمع فيه ولادي أسمعهم من غير أي حكم ومن غير أي مقارنة ممكن يبقى مشوار قصير أو أكلة سريعة أو حتى قعدة في العربية المكان هنا مش مهم المهم إني معاهم رساله بأقربهم أنا فاضي لك وإنت مهم بالنسبالي.
نصايح عملية لنجاح Date مع أولادك:
-خلي حضورك كامل من غير موبايل الوقت ده كله لهم.
-اسمع أكتر ما تتكلم اسمع مش عشان تجاوب ولا تصحح بس اسمع من قلبك الأسئلة البسيطة زي: إيه أحلى حاجة حصلت لك النهارده ؟
-متخليش المكان هو المهم أحيانًا قعدة على الرصيف أو مشوار بسيط أو أكلة سريعة بتكون أحلى من أي مكان فخم.
-اقبل مشاعرهم كلها حتى لو غضبوا أو زعلوا أو حتى حسيت إنهم مش عايزين يتكلموا وجودك معاهم بيديهم أمان.
-خلي Date عادة مش لازم مرة في السنة حاول تعمل مرة في الأسبوع أو كل كام يوم حسب ظروفك كل مرة بتحطوا فيها وقت لبعض العلاقة بتبقي اقوي اكتر .
-شاركهم جزء من حياتك كمان مش بس اسمع وريهم جزء من يومك ضحكتك او حاجات بتحبها ده بيخليهم يحسوا إن العلاقة متبادلة.
اللي اتعود يتحكي له وهو صغير لما يكبر هيعرف يحكي وهيعرف يحس بالأمان
واللي اتعود يتسمع له مش هيضطر يدور على حد غريب يسمعه.
احنا مش بنستني الغلط عشان نقرب ولا الأزمة عشان نتكلم بالعكس المطلوب نقعد معاهم نضحك ونحكي ونعيش اللحظة.
ده بالنسبة لي Date حقيقي بيزرع ثقة وحب وبيخلي أولادي دايمًا قريبين مني.
في الأخر …
اعزم ابنك على Date قبل ما الدنيا تبعده عنك مش الهدف بس خروج ولا وقت يعدي الهدف أننا نكون مع بعض ونكبر مع بعض وده أهم Date ممكن تعمله في حياتهم.
