«دخلت العناية واتهِمت ظلم».. سيدة تستغيث بعد حادث مروع بالإسكندرية
استغاثت سيدة تُدعى سارة طارق في منشور عبر موقع التواصل الاجتماعي «فيسبوك»، مطالبة بالتدخل لمساعدتها بعد تعرضها وأسرتها لحادث سير مروع على طريق صحراوي الإسكندرية، مؤكدة أنها تواجه اتهامات باطلة وتبعات قانونية جسيمة رغم كونها ضحية الحادث.
https://www.facebook.com/share/p/1C6C9FkRHJ/
وقالت سارة طارق إن الحادث وقع يوم 30 سبتمبر: «كنت راكبة مع زوجي العربية ورايحين نكشف لابننا، وللأسف شخص غالباً كان شارب دخل فينا من اليمين ودفع عربيتنا للحاجز الأسمنتي اللي على الطريق وقلب بينا العربية وحرفياً دشملها».
وأكدت: «أنا دخلت العناية المركزة وولادي إصابات وكدمات مختلفة، ولأن الشخص ده مش محترم عمل نفسه مصاب وبعدها هرب».
وأضافت: «بعد محاضر وبهدلة اتعملت قضيتين بينه وبين زوجي، ويوم الجلسة اكتشفنا إنه لعب في الورق على آخر لحظة واتهمني إني كنت سايقة وإن أنا اللي دخلت فيه، والمضحك بقى إن زوجي اتحكم عليه في قضية باعتبار إنه كان سايق، وأنا اتحكم عليا في قضية باعتبار إني كنت سايقة».
وتابعت: «طبعاً الكاميرات اتمسحت، وللعلم أنا مش بعرف أسوق أصلا ولا معايا رخصة.. وبناءاً عليه هو كده في وضع هيرفع عليا قضية قيادة بدون رخصة، وقضية تانية تعويض واللي على حد كلامه عايز نص مليون جنيه».
وواصلت حديثها: «الشخص ده أنا بدعي عليه ليل نهار ربنا ينتقم منه، لأن مش بس بسببه خسرنا عربيتنا ودخلت العناية المركزة واتبهدلنا حرفياً وولادي حصلتلهم تروما ودفعنا ومازلنا بندفع دم قلبنا لمحاميين وورق وكل القصص دي،، لأ ده كمان بيتهمني زور وبهتان وأخد حكم عليا وعلى زوجي في نفس الوقت».
واختتمت بقولها: «أنا كل اللي محتاجاه شخص يكون في مرور اسكندرية يقدر يجيب لي من كاميرا الرادار ما يثبت إن زوجي اللي كان سايق، لأن الحادث حصل على صحراوي الإسكندرية وكنا لسة معديين على رادار قسم شرطة مرغم».
