بعد السقا .. شريف منير يدعم محمد صلاح بفيديو : يا جبل ما يهزك ريح
وجه الفنان شريف منير، رسالة دعم لنجم الكرة المصرية اللاعب العالمي محمد صلاح، بعد أزمته الأخيرة مع مدربه الهولندي آرني سلوت، المدير الفني لفريق ليفربول الإنجليزي، وجاء ذلك بعد فيديو أحمد السقا عن نفس الأمر، والذي تصدر التريند في الساعات القليلة الماضية.
شريف منير يدعم محمد صلاح
وقال شريف منير خلال فيديو نشره عبر حسابه الرسمي على إنستجرام : "شوفت فيديو من شوية لأخويا وصديقي الفنان أحمد السقا باعت رسالة لـ محمد صلاح بيدعمه فيها .. أنا بضم صوتي لصوتك يا أحمد .. وبقولك يا صلاح كلنا بنحبك وأزمة وهتعدي .. وزي ما قال السقا المثل عندنا بيقول يا جبل ما يهزك ريح .. وأنت جبل وقوي ولاعب محترف .. وكل الناس بتحبك وعارفة قيمتك كويس جدًا".
بنحبك والعالم كله بيحبك
وتابع : "وماتديش ودانك لكلام الناس الشامتين .. لأن دول فشلة .. إحنا بنحبك والعالم كله بيحبك .. ودي قلة اللي بتقعد تقول كلام محبط .. لأن هما أساساً الإحباط نفسه".
رسالة حب من شريف منير لـ محمد صلاح
واختتم شريف منير رسالته لـ محمد صلاح، قائلًا : "بحبك يا صلاح وعارف إنك هتعدي الأزمة دي على خير .. وعارف إنك ذكي وهتقدر تمر من الموضوع ده بسلام بإذن الله .. تحياتي ليك وإن شاء الله بالنجاح المستمر".
أحمد السقا يرد على انتقادات فيديو محمد صلاح
يُذكر أن الفنان أحمد السقا، كان قد تعرض للانتقادات والسخرية بسبب فيديو دعمه لـ محمد صلاح باللغة الإنجليزية، وخرج السقا للرد على ذلك قائلًا : "احساسي عند مشاركة محمد صلاح اليوم في مباراة ليفربول كان شعوري بالفخر لابن بلدي وابن أمتي العربية وفرحة للاعب .. أنا بدعم صلاح في ليفربول والمنتخب .. زي ما دعمنا أحمد زويل ومجدي يعقوب مع حفظ الألقاب".
وأكمل أحمد السقا خلال مداخلة هاتفية برنامج الحكاية والمُذاع عبر قناة إم بي سي مصر : "أنتوا اللي عملتوني .. ولو مش عايزيني .. كل واحد يجيب العدة بتاعته ويفك الصامولة بتاعته ويرموني
وتابع مشيرًا إلى أن فكرة الفيديو الذي صوره تعتبر رسالة إلى آرني سلوت وإدارة ليفربول، وجاء أثناء تقليبه في التليفون، ووجد أن صلاح يبكي.
وأضاف أحمد السقا : "عز الدين أيبك اللي جوايا طلع .. فعملت فيديو صغير لدعم أخويا صلاح .. والفيديو كان فيه نوع من أنواع الدعم لصلاح .. وقولت أقول جزء من الكلام باللغة الإنجليزية .. واستخدام اعلى مصطلح علشان أوضحلهم إن الراجل اللي بيتكلم ده على علم وعلى دراية .. ووجهت رسالة .. ولما قولت كوتش كنت أقصد إنه كابتن .. وصلاح جوه الملعب بيوجهه زمايله".
