بشرى: أنا ليه مستثناه من الترشيحات بالأعمال الفنية وبقالي 3 سنين قاعدة ؟
تساءلت الفنانة بشرى، عن سبب عزوف المنتجين والمخرجين عن ترشيحها لأعمال فنية منذ فترة، خاصة بعد توليها إدارة المهرجانات والإنتاج.
وقالت بشرى خلال لقائها في برنامج ورقة بيضا عن سبب عدم خوضها السباق الرمضاني كل موسم رمضاني: اسألوا المسؤولين عن الإنتاج الرمضاني، أنا بسأل نفس السؤال.. أنا ليه مستثناه ومجنبني من الترشيحات، وهل أنا بأُرشح وولاد حلال عندهم حاجات كيدية جواهم علشان أنا دخلت في الإنتاج وإدارة المهرجانات بيحاربوني بشكل غير مباشر أو من تحت لتحت".
وأضافت بشرى:"أنا خسرت ناس بعد ما اتجهت لإنتاج وإدارة المهرجانات، ولكن أنا ما عملتش حاجة وحشة في حد، ومش عاوزة اتهم إنهم بيهمشوني بس أنا كده كده قاعدة في البيت، وآخر مرة اشتغلت من تلات سنين، هما يسألوا هذا السؤال، وعمري ما كلمت منتج سألته، لأني مقدرش أغير في انطباع حد لو واخد قرار، والمجال اتغير، زمان كنا بنسميها شلل دلوقتي بقى فيه شركات إدارة أعمال الفنانين، يعني شلل بس واخدة شكل بروفيشنال، وسبق وفكرت اتعاقد مع شركة لكنهم مش بيجبوا فرص عمل هما بيستنوا الفرصة تجيلك وياخدوا عليها نسبة".
وعن سبب عدم اهتمامها بالتسويق لنفسها على السوشيال ميديا قالت : مش عيب، ولكن العيب أنه يتلخص دور الفنان أنه ينسى مشواره واللي عمله والعظماء اللي اشتغل معاهم والجمهور اللي واثق فيه، ويتخلص دوره بأنه بيؤدي وظيفة إضافية، أنا في رأي إنها مهنة إضافية يستطيع القيام بها، أنا الحمد لله بعرف البس كويس وعندي خبرات إضافية، ولكن اللي حاصل دلوقتي الفنان بيستخدم للترويج في أشياء سواء مدفوعة أو لا لأ، أمال فين الفن والإبداع، حاليًا أصبح فيه استسهال".
