منعهم من بيع المخدرات.. تفاصيل مقتل شاب على يد 4 أشخاص بعين شمس

شهدت منطقة عين شمس بالقاهرة واقعة قتل مأسوية راح ضحيتها شاب يدعى محمود، بعدما اعترض على قيام عدد من الأشخاص ببيع المواد المخدرة في المنطقة، فقاموا بالاعتداء عليه بالضرب، قبل أن يخرج أحدهم سلاح ناري "فرد خرطوش" ويطلق عيارا ناريا أصابه وأودى بحياته في الحال.

بداية الخلاف

وكشف عادل شقيق المجني عليه في تصريحات لـ "نيوز رووم" تفاصيل الواقعة، قائلا: "الناس اللي قتلوا أخويا كانوا متخانقين معاه الصبح، علشان كانوا بيبيعوا مخدرات، وهو منعهم وقال لهم متجوش هنا تاني، وأخد منهم مخدرات بحوالي 50 ألف جنيه وولع فيها".

وتابع: "صاحب البضاعة واحد اسمه “مينا. ظ"، أول ما عرف إن أخويا خد منهم البضاعة وولع فيها إداهم فرد خرطوش وسكينتين وشومة، وقال لهم يا تجيبوا حق المخدرات يا تقتلوه، لأن البضاعة عاملة حوالي 50 ألف جنيه".

عودة المتهمين وتنفيذ الجريمة

وأضاف شقيق الضحية: "بعد كده رجعوا تاني في نفس اليوم بالليل بالتوك توك وابتدوا يبيعوا مخدرات على ناصية الحارة تاني وأخويا شافهم وقال لهم يمشوا من هنا، لكنهم مرضيوش وحصلت مشادة بينهم، واتخانقوا مع بعض وكانوا 4 أشخاص، وطلعوا السلاح والسكاكين اللي معاهم وكانوا عايزين يضربوا أخويا بس الناس بعدتهم عن بعض".  

وأكمل: "واحد من المتهمين شتم أخويا وهو راكب التوك توك، فرجع له أخويا محمود ومشي وراه ونزله من التوك توك واتخانقوا تاني، بعد كده واحد من المتهمين اسمه "محمود.أ" طلع فرد خرطوش كان معاه وضرب أخويا بطلقة كاملة فيها حوالي 140 بلية من مسافة قريب قتلته في لحظتها".

وأوضح عادل: "أنا مكنتش موجود وقت الواقعة، كنت شغال في مكان تاني، وعرفت اللي حصل لما ابن أختي اتصل بيا، جيت بسرعة ومكنتش مصدق اللي حصل، ومحدش كان متخيل إن الخناقة توصل للرصاص، كنا فاكرين آخرها مطواة أو سكينة، أخويا كان راجل وبيحب الكل، ومبيحبش يشوف الغلط ويسكت، وكان جدع مع الكل ومبيفوتش واجب، والمنطقة كلها بتحبه".

مطالبة بالقصاص

وفي نهاية حديثه، طالب شقيق المجني عليه بالقصاص العادل لشقيقه وإعدام المتهمين.